കരുനാഗപ്പള്ളി: ഓച്ചിറയില്‍ ബിവറേജസ് ഔട്ടലെറ്റിന് മുന്നില്‍ മദ്യം വാങ്ങാനെത്തിയവര്‍ തമ്മിലുണ്ടായ കത്തിക്കുത്തില്‍ ഒളിവിലായിരുന്ന പ്രതികള്‍ പിടിയിലായി. മേമന കണ്ണാടികിഴക്കതില്‍ അന്തന്‍പിളളയുടെ മകന്‍ ഹരികൃഷ്ണന്‍(19), മേമന മനീഷ് ഭവനത്തില്‍ മോഹന്‍പിളളയുടെ മകന്‍ മനീഷ് (20) എന്നിവരാണ് ഓച്ചിറ പൊലിസിന്റെ പിടിയിലായത്.
കഴിഞ്ഞ മാസം 27നായിരുന്നു സംഭവം. ഓച്ചിറ കല്ലൂര്‍മുക്കിലെ ബിവറേജസ് ഔട്ട്‌ലെറ്റില്‍ മദ്യം വാങ്ങാന്‍ വരി നില്‍ക്കുന്നതുമായി ബന്ധപ്പെട്ടുണ്ടായ വാക്കേറ്റമാണ് കത്തിക്കുത്തില്‍ കലാശിച്ചത്. ഇതില്‍ പരുക്കേറ്റ പ്രയാര്‍ വടക്ക് ആയിക്കാട്ട് പുത്തന്‍വീട്ടില്‍ വിജയന്റെ മകന്‍ വിനോദ് (32), ക്ലാപ്പന കുന്നുതറകിഴക്കതില്‍ രമേശ് (36) എന്നിവരെ ഗുരുതരപരുക്കുകളോടെ ആലപ്പുഴ വണ്ടാനം മെഡിക്കല്‍ കോളേജില്‍ പ്രവേശിപ്പിച്ചിരുന്നു. ഇരുവരും ഇപ്പോള്‍ സുഖം പ്രാപിച്ചിട്ടുണ്ട്. പിടിയിലായ ഹരികൃഷ്ണന്‍ നിരവധി ക്രിമിനല്‍ കേസുകളില്‍ പ്രതിയാണ്. സംഭവത്തിന് ശേഷം ഒളിവില്‍ പോയ പ്രതികളെ ഓച്ചിറ എസ്.ഐ.വിനോദ് ചന്ദ്രന്റെ നേതൃത്വത്തിലുള്ള പൊലിസ് സംഘമാണ് പിടികൂടിയത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.