കോഴിക്കോട്: മലബാര്‍ മേഖലയുടെ നിക്ഷേപാവസരം ലോകത്തിനുമുന്നില്‍ കാട്ടിക്കൊടുക്കുകയെന്ന ലക്ഷ്യത്തോടെ സംഘടിപ്പിക്കുന്ന ദ്വിദിന നിക്ഷേപസംഗമം 'ദ കേരള ഇന്‍വെസ്‌റ്റേഴ്‌സ് കോണ്‍ക്ലേവ് 2016' 22, 23 തിയതികളിലായി കോഴിക്കോട് യു.എല്‍ സൈബര്‍ പാര്‍ക്കില്‍ നടക്കും. 22ന് രാവിലെ ഒന്‍പതിന് മുഖ്യമന്ത്രി പിണറായി വിജയന്‍ നിക്ഷേപ സംഗമം ഉദ്ഘാടനം ചെയ്യും. മന്ത്രിമാരായ ഡോ. തോമസ് ഐസക്, എ.സി. മൊയ്തീന്‍, ടി.പി. രാമകൃഷ്ണന്‍, എ.കെ. ശശീന്ദ്രന്‍ തുടങ്ങിയവര്‍ പങ്കെടുക്കും.
 മലബാര്‍ മേഖലയിലെ വ്യവസായികള്‍, പ്രൊഫഷണലുകള്‍, സാങ്കേതികരംഗത്തെ വിദഗ്ധര്‍ എന്നിവരുടെ സംഘടനയായ ഗ്രേറ്റര്‍ മലബാര്‍ ഇനിഷ്യേറ്റീവി(ജി.എം.ഐ)ന്റെ നേതൃത്വത്തില്‍ നടക്കുന്ന സംഗമത്തില്‍ 300 വിദേശ വ്യവസായികളും 100 പ്രമുഖ ആഭ്യന്തര വ്യവസായികളും പങ്കെടുക്കും. സര്‍ക്കാര്‍ അധികാരികള്‍, നിക്ഷേപകര്‍, വ്യവസായികള്‍, വിദേശികള്‍, പ്രമുഖ കണ്‍സള്‍ട്ടന്റുകള്‍ എന്നിവര്‍ക്ക് അവസരങ്ങളുടെ സാധ്യതകള്‍ മനസിലാക്കാന്‍ നിക്ഷേപസംഗമം സഹായിക്കുമെന്ന് ജി.എം.ഐ പ്രസിഡന്റ് ഡോ. ആസാദ് മൂപ്പന്‍, ജി.എം.ഐ സ്ഥാപക അംഗം ഡോ. ഷബീര്‍ നെല്ലിക്കോട് എന്നിവര്‍ പറഞ്ഞു. ഐ.ടി, ടൂറിസം, ഇന്‍ഫ്രാസ്ട്രക്ചര്‍, ആരോഗ്യസംരക്ഷണം, കൃഷി, ഭക്ഷ്യവസ്തുക്കളുടെ സംസ്‌കരണം, വ്യവസായം, വിദ്യാഭ്യാസം, സ്‌കില്‍ ഡവലപ്‌മെന്റ്, പവര്‍, മൂല്യവര്‍ധിത വസ്തുക്കള്‍ എന്നിവയിലെ നിക്ഷേപാവസരങ്ങള്‍ ചര്‍ച്ച ചെയ്യും.
മലബാറിലെ ടൂറിസം മേഖല ഇപ്പോഴും അവഗണിക്കപ്പെട്ടുകിടക്കുകയാണെന്നും വയനാട്, ബേക്കല്‍, കാപ്പാട് എന്നീ പ്രദേശങ്ങളെ യോജിപ്പിച്ചുകൊണ്ടുള്ള ഒരു പദ്ധതിയുടെ സാധ്യതകളിലേക്കാണ്  ജി.എം.ഐ ശ്രദ്ധയൂന്നുന്നതെന്നും ഡോ. ആസാദ് മൂപ്പന്‍ പറഞ്ഞു. മാവൂരിലെ ഗ്രാസിം ഇന്‍ഡസ്ട്രീസിന്റെ കീഴിലുള്ള 312 ഏക്കര്‍ ഭൂമിയില്‍ ഒരു സ്മാര്‍ട്ട് സിറ്റിയെക്കുറിച്ചും ആലോചനയുണ്ടെന്നും അദ്ദേഹം പറഞ്ഞു.
കേരള സ്റ്റേറ്റ് ഇന്‍ഡസ്ട്രീസ് ഡവലപ്‌മെന്റ് കോര്‍പ്പറേഷന്‍, കിന്‍ഫ്ര, കേരള ടൂറിസം ഡവലപ്‌മെന്റ് കോര്‍പ്പറേഷന്‍ എന്നിവരുടെ ഔദ്യാഗിക പ്രതിനിധികളും യോഗത്തില്‍ പങ്കെടുക്കും.