കുറ്റ്യാടി: കൃഷിഭവന്‍ വഴി സംഭരിച്ച നാളികേരത്തിന്റെ വില ലഭിക്കാത്തതു കാരണം കര്‍ഷകര്‍ പ്രതിസന്ധിയിലാകുന്നു. ആറുമാസം മുന്‍പ് ശേഖരിച്ച നാളികേരത്തിന് വില ലഭിക്കാത്തതാണ് പ്രതിസന്ധിക്കു കാരണം.
14 രൂപ വിലയുണ്ടായിരുന്നപ്പോഴാണ് കൃഷിഭവന്‍ വഴി കിലോക്ക് 25 രൂപ നല്‍കി കര്‍ഷകരില്‍ നിന്ന് നേരിട്ട് സംഭരിച്ചത്. വിലത്തകര്‍ച്ചയും വരള്‍ച്ചയും ഉല്‍പാദനക്കുറവും കാരണം പ്രയാസമനുഭവിച്ച കര്‍ഷകര്‍ ഏറെ പ്രതീക്ഷയോടെയാണ് കൃഷിഭവനുകളില്‍ നാളികേരം എത്തിച്ചത്. കാര്‍ഷികമേഖലകളില്‍ വളപ്രയോഗത്തിന്റെയും കീടനാശിനി പ്രയോഗത്തിന്റെയും സമയമായിട്ടും ഒന്നും ചെയ്യാനാവാത്ത അവസ്ഥയിലാണ് കര്‍ഷകര്‍. കൃഷിഭവന്‍ വഴി സംഭരിച്ച നാളികേരത്തിന്റെ കുടിശ്ശിക കൊടുത്തുവീട്ടാന്‍ അടിയന്തര നടപടി വേണമെന്നാവശ്യപ്പെട്ട് പ്രക്ഷോഭത്തിനൊരുങ്ങുകയാണ് കര്‍ഷക സംഘടനകള്‍.