അങ്കാറ: സിറിയയില്‍ ആക്രമണം നടത്തുന്ന തുര്‍ക്കി സൈന്യം 200 കുര്‍ദ് പോരാളികളെ വധിച്ചതായി തുര്‍ക്കി.
മറാത് ഉം ഹഊഷ് മേഖലയില്‍ 18 വ്യോമാക്രമണങ്ങളാണ് തുര്‍ക്കി വ്യോമസേന നടത്തിയത്. വടക്കന്‍ അലെപ്പോയിലാണ് ഈ പ്രദേശം. തുര്‍ക്കി ഔദ്യോഗിക വാര്‍ത്താ ഏജന്‍സി അനാദൊലുവാണ് ഇക്കാര്യം റിപ്പോര്‍ട്ട് ചെയ്തത്.
കുര്‍ദ് സൈനിക വിഭാഗമായ (വൈ.പി.ജി)യിലെ 160 നും 200 നും ഇടയിലുള്ള പോരാളികളെ വധിച്ചുവെന്നാണ് തുര്‍ക്കി സൈന്യം പറയുന്നത്. ബുധനാഴ്ച രാത്രിയാണ് ആക്രമണം നടന്നത്.
എന്നാല്‍ തുര്‍ക്കി സൈന്യം ആക്രമണം നടത്തിയ വിവരം കുര്‍ദ് നേതാക്കള്‍ സ്ഥിരീകരിച്ചു. എന്നാല്‍ പത്തു പേരിലധികം ജീവഹാനി സംഭവിച്ചിട്ടില്ലെന്ന് അവര്‍ പറഞ്ഞു.
സിറിയന്‍ ഒബ്്‌സര്‍വേറ്ററി ഗ്രൂപ്പിന്റെ കണക്കനുസരിച്ച് 26 പേരാണ് കൊല്ലപ്പെട്ടത്. 20 വ്യോമാക്രമണങ്ങള്‍ നടന്നുവെന്ന് സംഘടന പറഞ്ഞു.
വൈ.പി.ജി ഉപയോഗിച്ച ഒന്‍പതു കെട്ടിടങ്ങള്‍ക്കെതിരേയാണ് വ്യോമാക്രമണം നടന്നത്. ഇത് വൈ.പി.ജിയുടെ ഷെല്‍ട്ടറും യോഗസ്ഥലവും ആയുധപ്പുരയുമായി ഉപയോഗിച്ച കെട്ടിടമാണെന്ന് അനാദൊലു പറഞ്ഞു.
ഇവരുടെ നാലു സൈനിക വാഹനങ്ങളും തകര്‍ത്തിട്ടുണ്ട്. ഐ.എസിനും വൈ.പി.ജിക്കും എതിരേ തുര്‍ക്കി സിറിയയില്‍ കര,വ്യോമാ ആക്രമണങ്ങള്‍ നടത്തുന്നുണ്ട്.