കട്ടപ്പന: വഴിത്തര്‍ക്കം പരിഹരിക്കാനെത്തിയ ഡി.വൈ.എസ്.പിയെ കൈയേറ്റംചെയ്ത കേസില്‍ രണ്ടുപേര്‍ അറസ്റ്റില്‍. കോമ്പമുക്ക് ഗോകുലം ഗിരീഷ്(30), കമ്പംമെട്ട് പ്രകാശ്ഗ്രാം പുത്തന്‍വീട്ടില്‍ സനീഷ്(27) എന്നിവരാണ് അറസ്റ്റിലായത്.
കുരുവിക്കാനത്തെ ഒരു സ്വകാര്യ റിസോര്‍ട്ടും പ്രദേശവാസികളും തമ്മില്‍ നിലനിന്നിരുന്ന തര്‍ക്കം ബുധനാഴ്ച കട്ടപ്പന ഡി.വൈ.എസ്.പി എന്‍.സി. രാജ്‌മോഹനന്റെ നേതൃത്വത്തില്‍ ഡി.വൈ.എസ്.പി ഓഫീസില്‍ പരിഹരിച്ചിരുന്നു. പൊതുസ്ഥലം കൈയേറിയതായും വഴിയടച്ച് വേലി നിര്‍മിച്ചതായും ബ്ലോക്ക് പഞ്ചായത്ത് കുളം കൈവശപ്പെടുത്തി എന്നതും സംബന്ധിച്ചാണ് തര്‍ക്കം നിലനിന്നിരുന്നത്. പ്രദേശവാസികളുടെയും ജനപ്രതിനിധികളുടെയും സാന്നിധ്യത്തില്‍ നടന്ന ചര്‍ച്ചയില്‍ വഴി വിട്ടുനല്‍കുവാനും കുളത്തില്‍നിന്നും പൊതുജനങ്ങള്‍ക്ക് വെള്ളം നല്‍കുവാനും റിസോര്‍ട്ട് ഉടമ സമ്മതിച്ചിരുന്നു. ഇതിന്റെ അടിസ്ഥാനത്തില്‍ ബുധനാഴ്ച വൈകുന്നേരം വഴി തുറന്നുകൊടുക്കുവാന്‍ എത്തിയ ഡി.വൈ.എസ്.പിയെയാണ് റിസോര്‍ട്ട് ജീവനക്കാര്‍ മര്‍ദിച്ചത്.