കരിങ്കല്ലത്താണി: അപകടങ്ങള്‍ തുടര്‍ക്കഥയാകുന്ന താഴെക്കോട് കരിങ്കല്ലത്താണി മേഖലയില്‍ റോഡ് സുരക്ഷാ ബോധവത്കരണവുമായി വിദ്യാര്‍ഥികള്‍ രംഗത്തിറങ്ങി. താഴെക്കോട് പി.ടി.എം ഹയര്‍ സെക്കന്‍ഡറി സ്‌കൂളിലെ എന്‍.എസ്.എസ് യൂനിറ്റ് അംഗങ്ങളാണ് താഴെക്കോട് കാപ്പുപറമ്പില്‍ ഡൈവ്രര്‍മാര്‍ക്ക് ബോധവത്കരണം നല്‍കിയത്. ഇതിന്റെ ഭാഗമായി വാഹന യാത്രക്കാര്‍ക്ക് ലഘുലേഖയും മതിയായ രേഖകളുമായി യാത്ര ചെയ്തവര്‍ക്ക് മിഠായിയും വിതരണം ചെയ്തു.
പ്രവര്‍ത്തനങ്ങള്‍ക്ക് അധ്യാപകരായ ഷഫീഖ്, നിദ, എന്‍.എസ്.എസ്. അംഗങ്ങളായ വിജയ്ദാസ്, തുര്‍മുദി, റാഹിബ്, അന്‍ഷാദ് തുടങ്ങിയവര്‍ നേതൃത്വം നല്‍കി. രണ്ടു ദിവസങ്ങള്‍ക്ക് മുമ്പ് ഈ പാതയില്‍ ചരക്കുലോറിയും സ്‌കൂട്ടറും കൂട്ടിയിടിച്ച് ഒരാള്‍ മരിച്ചിരുന്നു.