വേങ്ങര: വേങ്ങര മണ്ഡലത്തിലെ ആറു പഞ്ചായത്തുകളിലായി റിയാദ് വേങ്ങര മണ്ഡലം കെ.എം.സി.സി നിര്‍മിച്ചുനല്‍കിയ ഏഴു ബൈത്തുറഹ്മകളുടെ താക്കോല്‍ദാനം ഇന്നു നടക്കും.
വൈകിട്ട് ആറിനു കുറ്റാളൂര്‍ ഖലീജ് ഓഡിറ്റോറിയത്തില്‍ നടക്കുന്ന ചടങ്ങില്‍ പാണക്കാട് സയ്യിദ് ഹൈദരലി ശിഹാബ് തങ്ങളാണ് വീടുകളുടെ താക്കോല്‍ കൈമാറുക. റിയാദ് മലപ്പുറം ജില്ലാ കെ.എം.സി.സി ജില്ലയില്‍ നിര്‍മിച്ചുനല്‍കുന്ന 34 വീടുകളില്‍ ഉള്‍ക്കൊള്ളിച്ചാണ് ഈ പദ്ധതി.
ഊരകം തങ്ങള്‍ പടി, പറപ്പൂര്‍ പൊട്ടിപ്പാറ, വേങ്ങര ടൗണ്‍, കണ്ണമംഗലം ചേറൂര്‍ അടിവാരം, എ.ആര്‍ നഗര്‍ കുന്നുംപുറം, ഒതുക്കുങ്ങല്‍ മറ്റത്തൂര്‍ എന്നിവിടങ്ങളിലാണ് ഏഴു കുടുംബങ്ങള്‍ക്ക് വീടു കൈമാറുന്നത്.
ബൈത്തുറഹ്മ താക്കോല്‍ദാനത്തോടനുബന്ധിച്ചു നടക്കുന്ന പൊതുസമ്മേളനവും സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്യും. മുഹമ്മദ് തൊമ്മങ്ങാടന്‍ അധ്യക്ഷനാകും. പ്രതിപക്ഷ ഉപനേതാവ് പി.കെ കുഞ്ഞാലിക്കുട്ടി മുഖ്യപ്രഭാഷണം നടത്തും. പാണക്കാട് സയ്യിദ് സ്വാദിഖലി ശിഹാബ് തങ്ങള്‍, പി. ഉബൈദുള്ള എം.എല്‍.എ, ജില്ലാ പഞ്ചായത്ത് പ്രസിഡന്റ് എ.പി ഉണ്ണികൃഷ്ണന്‍, ബ്ലോക്ക് പഞ്ചായത്ത് പ്രസിഡന്റ് പി.കെ അസ്‌ലു, ശരീഫ് കുറ്റൂര്‍, അഡ്വ. ഫൈസല്‍ ബാബു, റഫീഖ് പാറക്കല്‍, അബ്ദുറഹ്മാന്‍ പൊന്‍മള സംസാരിക്കും.
റാഷിദ് കോട്ടുമല സ്വാഗതവും പി.പി ഹസ്സന്‍ നന്ദിയും പറയും.
വാര്‍ത്താസമ്മേളനത്തില്‍ തൊമ്മങ്ങാടന്‍ മുഹമ്മദ്, പി.പി ഹസന്‍, റാഷിദ് കോട്ടുമല, എം.കെ കുഞ്ഞബ്ദുള്ള, ടി. അബ്ദുല്‍ ഹഖ് പങ്കെടുത്തു.