കാഞ്ഞങ്ങാട്: ഗൗഡ സാരസ്വത ബ്രാഹ്മണരുടെ ആത്മീയ ഗുരുവായ കാശി മഠാധിപതി ശ്രീമദ് സംയമീന്ദ്ര തീര്‍ത്ഥമ സ്വാമിജിയുടെ വ്രതാനുഷ്ടാനത്തിന്റെ സമാപനം കുറിച്ച് കൊണ്ട് ഇന്ന് കാഞ്ഞങ്ങാട് നഗരത്തില്‍ 'ദിഗ് വിജയ ഘോഷയാത്ര' നടക്കുന്നതിനെ തുടര്‍ന്ന് ഗതാഗതം നിയന്ത്രണം ഏര്‍പെടുത്തിയതായി ഹൊസ്ദുര്‍ഗ് സി.ഐ അറിയിച്ചു.
കാഞ്ഞങ്ങാട് പുതിയ ബസ് സ്റ്റാന്‍ഡ് പരിസരം മുതല്‍ കോട്ടച്ചേരി ട്രാഫിക് കവല വരെയാണ് ഘോഷയാത്ര. ഇന്ന് ഉച്ചക്ക് മൂന്നു മുതല്‍ രാത്രി മൂന്നു വരെയാണ് ഗതാഗത നിയന്ത്രണം ഏര്‍പെടുത്തുന്നത്. നീലേശ്വരം ഭാഗത്ത് നിന്നും വരുന്ന വാഹനങ്ങള്‍ കാഞ്ഞങ്ങാട് സൗത്തില്‍ നിന്നും നഗരത്തിലേക്ക് പ്രവേശിക്കാതെ ദേശീയപാതയിലൂടെ യാത്ര തുടരുകയും മാവുങ്കാല്‍ വഴി നഗരത്തിലേക്കും മൂലക്കണ്ടം വെള്ളിക്കോത്ത് വഴി ചന്ദ്രഗിരി പാതയിലും കൂടി സഞ്ചരിക്കണം.
കാഞ്ഞങ്ങാട് റെയില്‍വേ സ്‌റ്റേഷന് പടിഞ്ഞാറ് ഭാഗം പോകേണ്ടവര്‍ പടന്നക്കാട് റെയില്‍വേ ഓവര്‍ ബ്രിഡ്ജില്‍ കയറാതെ കരുവളം, ഒഴിഞ്ഞവളപ്പ്, കല്ലൂരാവി വഴിയും യാത്ര ചെയ്യേണ്ടതാണ്.
വടക്ക് ചന്ദ്രഗിരി റോഡിലൂടെ തെക്കോട്ട് പോകേണ്ടവര്‍ മടിയന്‍ ജംഗ്ഷനില്‍ നിന്നും കിഴക്ക് വെള്ളിക്കോത്ത് വഴി മൂലക്കണ്ടം നാഷണല്‍ ഹൈവേയിലും ടൗണിന് പടിഞ്ഞാറ് പോകേണ്ടവര്‍ അജാനൂര്‍ ഇഖ്ബാല്‍ റെയില്‍വേ ഗേറ്റ് വഴിയും പോകേണ്ടതാണെന്നും പൊലിസ് അറിയിച്ചു.