തിരുവനന്തപുരം: വയലാര്‍ രാമവര്‍മ സാംസ്‌കാരികവേദിയുടെ ഒമ്പതാമതു സംഗീത-സാഹിത്യപുരസ്‌കാരങ്ങള്‍ പ്രഖ്യാപിച്ചു.
സംഗീത സംവിധായകനുള്ള പുരസ്‌കാരം പെരുമ്പാവൂര്‍ ജി. രവീന്ദ്രനാഥിനും ഗാനരചനക്കു ചുനക്കര രാമന്‍കുട്ടിക്കും ആലാപനത്തിനു അമ്പിളിക്കും സാഹിത്യരംഗത്തെ പുരസ്‌കാരത്തിന് നോവലിസ്റ്റ് സജിന്‍ ശ്രീധരനും അര്‍ഹരായതായി ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു. 10,001 രൂപയും ഫലകവും പ്രശസ്തിപത്രവുമാണു പുരസ്‌കാരം. വയലാറിന്റെ 41-ാം ചരമവാര്‍ഷിക ദിനമായ 27നു വൈകിട്ട് ആറിനു തിരുവനന്തപുരം തൈക്കാട് ഭാരത്ഭവനില്‍ നടക്കുന്ന ചടങ്ങില്‍ വൈദ്യുതി മന്ത്രി കടകംപള്ളി സുരേന്ദ്രന്‍ പുരസ്‌കാരങ്ങള്‍ വിതരണം ചെയ്യും. വാര്‍ത്താസമ്മേളനത്തില്‍ വയലാര്‍ സാംസ്‌കാരികവേദി പ്രസിഡന്റ് അഡ്വ. കെ. ചന്ദ്രിക, ഭാരവാഹികളായ എസ്.ആര്‍ കൃഷ്ണകുമാര്‍, ജയശ്രി എന്നിവര്‍ പങ്കെടുത്തു.