തിരുവനന്തപുരം: പുതിയ ഏകീകൃത പെന്‍ഷന്‍ പദ്ധതി കേന്ദ്രസര്‍ക്കാര്‍ പ്രഖ്യാപിച്ചിട്ടും കേരളത്തില്‍ ഏതു പദ്ധതി നടപ്പാക്കണമെന്ന ആലോചന പോലും സര്‍ക്കാര്‍ ഇതുവരെ ആരംഭിച്ചിട്ടില്ല. ധനമന്ത്രിയും നിയമമന്ത്രിയും ചീഫ്‌സെക്രട്ടറിയും അംഗങ്ങളായ സമിതിയെയാണ് പങ്കാളിത്ത പെന്‍ഷന്‍ പദ്ധതിക്ക് പകരമൊരു പദ്ധതിയെകുറിച്ചു പഠിക്കാന്‍ സര്‍ക്കാര്‍ നവംബര്‍ രണ്ടിന് (2023)ചുമതലപ്പെടുത്തിയത്. 

എന്നാല്‍ സമിതി രൂപീകരിച്ച് 10 മാസം കഴിഞ്ഞിട്ടും മീറ്റിങ് പോലും ചേര്‍ന്നിട്ടില്ല. അന്നത്തെ സമിതിയില്‍ അംഗമായുണ്ടായിരുന്ന ചീഫ് സെക്രട്ടറി വേണു കഴിഞ്ഞ മാസം വിരമിക്കുകയും ചെയ്തു. പങ്കാളിത്ത പെന്‍ഷന്‍, ഏകീകൃത പെന്‍ഷന്‍, സ്റ്റാറ്റിയൂട്ടറി പെന്‍ഷന്‍ എന്നിവയില്‍ ഏതാണ് വേണ്ടതെന്ന് തിരഞ്ഞെടുക്കുകയോ പുതിയ പെന്‍ഷന്‍ പദ്ധതി രൂപീകരിക്കുകയോ ചെയ്യാത്തതിനാല്‍ 2 ലക്ഷത്തോളം പങ്കാളിത്ത പെന്‍ഷന്‍കാര്‍ സംസ്ഥാനത്ത് ആശങ്കയിലാണ്.

പങ്കാളിത്ത പെന്‍ഷന്‍ പിന്‍വലിക്കണമെന്നും പകരം നിശ്ചിത തുക പെന്‍ഷന്‍ തുക ലഭിക്കുന്ന പുതിയ പദ്ധതി കൊണ്ടുവരുമെന്നും കഴിഞ്ഞ സംസ്ഥാന ബജറ്റില്‍ ധനമന്ത്രി പ്രഖ്യാപിച്ചിരുന്നു. ഇതിനുശേഷമാണ് കേന്ദ്രം പുതിയ ഏകീകൃത പെന്‍ഷന്‍പദ്ധതിപ്രഖ്യാപിച്ചത്. ഈ പദ്ധതിയില്‍ പെന്‍ഷന്‍ ഫണ്ടിലേക്കുള്ള സര്‍ക്കാരിന്റെ വിഹിതം 18.5 ശതമാനമായതിനാല്‍ സംസ്ഥാന സര്‍ക്കാരിനു താങ്ങാന്‍ കഴിയില്ലെന്നാണ് ധനവകുപ്പിന്റെ വിലയിരുത്തല്‍. അതുകൊണ്ട് പുതിയ പെന്‍ഷന്‍ പദ്ധതി തന്നെ നടപ്പാക്കാനാണ് ആലോചന.  ഇക്കാര്യത്തില്‍ തീരുമാനം വൈകുന്നത് പങ്കാളിത്ത പെന്‍ഷന്‍കാര്‍ക്ക് സാമ്പത്തികനഷ്ടമുണ്ടാക്കും.