പേരാമ്പ്ര: ആവള മൂഴിക്കല്‍കടവില്‍ അനധികൃത മണല്‍ക്കടത്ത് തടയാനെത്തിയ പൊലിസ് ഉദ്യോഗസ്ഥരെ വാഹനമിടിച്ച് വധിക്കാന്‍ ശ്രമിച്ച കേസില്‍ രണ്ടുപേര്‍ കൂടി അറസ്റ്റിലായി.
 ആവള പെരിഞ്ചേരിതാഴ സുബൈര്‍ (30), പെരിഞ്ചേരി കുഞ്ഞുമോന്‍ എന്ന ഷിജിന്‍ ലാല്‍ (28) എന്നിവരെയാണ് മേപ്പയൂര്‍ പൊലിസ് അറസ്റ്റ് ചെയ്തത്. പ്രതികളെ കോടതി റിമാന്‍ഡ് ചെയ്തു.
കഴിഞ്ഞ തിങ്കളാഴ്ചയാണ് മേപ്പയൂര്‍ എസ്.ഐ. നിജേഷിനെയും സീനിയര്‍ പൊലിസ് ഓഫിസര്‍ സുനില്‍ കുമാറിനെയും ടിപ്പര്‍ലോറി കയറ്റി വധിക്കാന്‍ ശ്രമിച്ചത്. കേസില്‍ ആറു പ്രതികളാണുള്ളത്. രണ്ടു ദിവസം മുന്‍പ് ഒന്നാംപ്രതി കോട്ടയില്‍ അബ്ദുല്ലയെ അറസ്റ്റ് ചെയ്ത് റിമാന്‍ഡ് ചെയ്തിരുന്നു.
സംഭവത്തില്‍ ഗുരുതര പരുക്കേറ്റ സി.പി.ഒ സുനില്‍ കുമാര്‍ കോഴിക്കോട് മെഡിക്കല്‍ കോളജില്‍ ചികിത്സയിലായിരുന്നു. കേസില്‍ മൂന്നു പ്രതികളെ കൂടി പിടികൂടാനുണ്ട്.