തിരൂരങ്ങാടി: റോഡരികിലെ വയലില്‍ കക്കൂസ് മാലിന്യം തള്ളിയ മൂന്നുപേരെ പൊലിസ് പിടികൂടി. കൊപ്പം മണ്ണേക്കാട് മടത്തില്‍പറമ്പ് നൗഷാദ് (30), എറണാകുളം മരട് സ്വദേശി കളപ്പുരക്കല്‍ പ്രസാദ് (50), പെരുമ്പിലായ അവിഞ്ഞിക്കാട് മുഹ്‌സിന്‍ (18) എന്നിവരെയാണ് തിരൂരങ്ങാടി പൊലിസ് അറസ്റ്റ് ചെയ്തത്.
മൂന്നിയൂര്‍ മുട്ടിച്ചിറയിലെ വയലില്‍ ഇന്നലെ പുലര്‍ച്ചെയാണ് സംഭവം. വാഹനത്തിലെത്തി കക്കൂസ് മാലിന്യം തള്ളുന്നതിനിടെയാണ് രാത്രി പരിശോധനയ്ക്കിറങ്ങിയ പൊലിസ് സ്ഥലത്തെത്തിയത്. മൂന്നു പേരെയും മിനി ലോറിയും പൊലിസ് കസ്റ്റഡിയിലെടുത്തു.
വീടുകളിലേയും മറ്റും കക്കൂസ് ടാങ്കുകള്‍ വൃത്തിയാക്കുന്ന തൊഴിലാളികളാണ് ഇവര്‍. ശേഖരിക്കുന്ന മാലിന്യം പലയിടങ്ങളിലായി തള്ളുകയാണ് പതിവെന്നു പൊലിസ് പറഞ്ഞു.
ഈയിടെയായി കൂരിയാട് പനമ്പുഴക്കടവിലും കക്കൂസ് മാലിന്യം തള്ളിയിരുന്നു. പ്രതികളെ കേസ്സെടുത്തു ജാമ്യത്തില്‍ വിട്ടു. വാഹനം പൊലിസ് കസ്റ്റഡിയിലാണ്.