കണ്ണൂര്‍: ട്രെയിനില്‍ കടത്തിയ 30,000 രൂപയുടെ ലഹരി വസ്തുക്കളുമായി രണ്ടുപേരെ റെയില്‍വേ സംരക്ഷണ സേന അറസ്റ്റുചെയ്തു. ഇന്നലെ പുലര്‍ച്ചെ അഞ്ചോടെ കണ്ണൂരിലെത്തിയ നിസാമുദ്ദീന്‍-എറണാകുളം മംഗള എക്‌സ്പ്രസിന്റെ ജനറല്‍ കോച്ചിലാണു 1220 പാക്കറ്റു ലഹരി വസ്തുക്കള്‍ പിടികൂടിയത്. കൊല്‍ക്കത്ത കാമാര്‍ഹട്ടി സ്വദേശി ദുര്‍ഘ ശങ്കര്‍(25), ഉത്തര്‍പ്രദേശ് ബാങ്കട്ട് സ്വദേശി ധര്‍മേന്ദ്രകുമാര്‍(19) എന്നിവരെയാണു ആര്‍.പി.എഫ് എ.എസ്.ഐ ടി വിനോദ്, കോണ്‍സ്റ്റബിള്‍മാരായ അനില്‍, പ്രഷീദ് എന്നിവര്‍ ചേര്‍ന്നു പിടികൂടിയത്. മംഗളൂരുവില്‍ നിന്നു കണ്ണൂരില്‍ വില്‍പനയ്ക്കു കൊണ്ടുവരികയായിരുന്നു ലഹരി വസ്തുക്കള്‍. ഇവ എക്‌സൈസിനു കൈമാറി.