ചെത്തല്ലൂര്‍: ചെത്തല്ലൂര്‍ സൗത്ത് പാടശേഖരത്തിലെ ആറങ്കോട്പാടത്ത് കൃഷിയിറക്കാനാവാതെ കര്‍ഷകര്‍ വലയുന്നു. കൃഷിക്കാവശ്യമായ വെള്ളം കിട്ടാത്തതാണ് പ്രധാന പ്രശ്‌നം. കാലാവസ്ഥാ വ്യതിയാനം കാരണം ഒന്നാം വിളയിറക്കാന്‍ കഴിയാത്തതോടെ രണ്ടാം വിളക്കായി തയ്യാറാക്കിയ ഞാറ്റടികള്‍ ഉണങ്ങിയും ചിലത് മൂപ്പേറിയും നശിച്ചു.
പൊന്‍മണി വിത്തായിരുന്നു ഇവിടെ രണ്ടാം വിളക്കായി തയ്യാറാക്കിയിരുന്നത്. എന്നാല്‍ ആവശ്യത്തിന് വെള്ളം കിട്ടാത്തതിനാല്‍ ചെറുകിട കര്‍ഷര്‍  ദുരിതത്തിലായത് പ്രദേശത്ത് പഞ്ചായത്തിന്റെ ജലസേചന പദ്ധതികള്‍ ഇല്ലാത്തത് കര്‍ഷകരെ ദുരിതത്തിലാക്കുന്നു.
നിലവില്‍ കര്‍ഷകര്‍ ഉപയോഗിച്ചിരുന്ന കുളത്തില്‍നിന്ന് വെള്ളം ലഭിക്കാത്ത അവസ്ഥയാണിപ്പോള്‍. നെല്‍കൃഷിക്ക് മതിയായ വെള്ളം ലഭിക്കാതത്തിനാല്‍ ചിലയിടങ്ങളില്‍ കവുങ്ങ്, റബ്ബര്‍ എന്നിവ വെച്ചുപിടിപ്പിച്ചതും കര്‍ഷകര്‍ക്ക് തിരിച്ചടിയായി. മതിയായമഴലഭിക്കാത്തതിനാല്‍ കര്‍ഷകരും ദുരിതത്തിലാണ്.
പുതിയ ജലസേചന പദ്ധതികള്‍ നടപ്പാക്കിയാല്‍ മാത്രമേ കര്‍ഷകര്‍ക്ക് നല്ല രീതിയില്‍ കൃഷി നടത്താനാവൂ എന്നാണ് കര്‍ഷകര്‍ പറയുന്നത്. ജലസേചന പദ്ധതിക്ക് സമീപത്തെ തൂതപ്പുഴയില്‍ നിന്നും വെള്ളം ലഭിക്കുമെന്നതിനാല്‍ സുഗമമായി പദ്ധതി നടപ്പാക്കാമെന്നാണ് കര്‍ഷകര്‍ പറയുന്നത്.