പെരുമ്പാവൂര്‍: കേരളപിറവിയുടെ അറുപതാം വാര്‍ഷികവും ജ്ഞാനപീഠ പുരസ്‌കാര ലബ്ധിയുടെ സുവര്‍ണ ജൂബിലിയും പെരുമ്പാവൂര്‍ നിയോജകമണ്ഡലത്തില്‍ അഡ്വ. എല്‍ദോസ് കുന്നപ്പിള്ളി എം.എല്‍.എയുടെ നേതൃത്വത്തില്‍ നവംബര്‍ ഒന്ന് മുതല്‍ ഒരു മാസം നീണ്ടുനില്‍ക്കുന്ന ഭാഷാമാധുരി ഉത്സവമായി ആഘോഷിക്കും.
എം.എല്‍.എ ആവിഷ്‌കരിച്ച പുസ്തക ചങ്ങാത്തം പദ്ധതിയുടെ ഭാഗമായാണു പരിപാടികള്‍ സംഘടിപ്പിക്കുന്നത്. കേരള സാഹിത്യ അക്കാദമി, സംസ്ഥാന ബാലസഹിത്യ ഇന്‍സ്റ്റിറ്റൂട്ട്, നാടന്‍ കല അക്കാദമി, ലളിതകല അക്കാദമി, എന്നിവയുടെ സഹകരണത്തൊടെ പെരുമ്പാവൂര്‍ മണ്ഡലത്തിലെ വിദ്യാലയങ്ങള്‍, വായനശാലകള്‍, സാംസ്‌കാരിക സംഘടനകള്‍ എന്നിവിടങ്ങളിലായി നൂറു കേന്ദ്രങ്ങളിലാണു പരിപാടികള്‍ സംഘടിപ്പിക്കുന്നത്. പുസ്തകോത്സവം, പുതിയ പുസ്തകങ്ങളുടെ പ്രകാശനം, നാടന്‍ കലകളുടെ അവതരണം, ആചാര്യവന്ദനം, സെമിനാറുകള്‍, ഭാഷവൈജ്ഞാനിക മല്‍സരങ്ങള്‍ മുഖ്യപരിപാടികളായി സംഘടിപ്പിക്കപ്പെടും.
പെരുമ്പാവൂര്‍ നിയോജകമണ്ഡലത്തിലെ എഴുത്തുകാരുടെ പുസ്തക പ്രസിദ്ധികരണം, പുരസ്‌കാര സമര്‍പ്പണം, സാഹിത്യശില്‍പ്പശാല, അയ്യായിരം വിദ്യാര്‍ത്ഥികള്‍ക്ക് പുസ്തക വിതരണം, എഴുത്തുകാരുടെ ഫോട്ടോ അനാഛാദനം ഇവയും പദ്ധതിയുടെ ഭാഗമാണു. പെരുമ്പാവൂര്‍ ഗവ. ബോയ്‌സ് എല്‍.പി സ്‌കൂളില്‍ പ്രധാന അധ്യാപകരുടെയും സാംസ്‌കാരിക പ്രവര്‍ത്തകരുടെയും യോഗം ചേര്‍ന്ന് പരിപാടികള്‍ക്ക് രൂപം നല്‍കി.