മലയിന്‍കീഴ്: വീടിനു മുന്നില്‍ കളിക്കുകയായിരുന്ന എട്ടുവയസ്സുകാരനെ തെരുവുനായ ആക്രമിച്ചു.
ഗുരുതരമായി പരുക്കേറ്റ കുട്ടിയെ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ഊരൂട്ടമ്പലം കടമാലക്കല്‍ മേലെ പുത്തന്‍ വീട്ടില്‍ ബിനു-അഞ്ചു ദമ്പതികളുടെ മകന്‍ അഭിജിത്താ (8)ണു  ആക്രമണത്തിനിരയായത്.
ബുധനാഴ്ച വൈകുന്നേരമായിരുന്നു സംഭവം.  വീടിനു മുന്നില്‍  കൂട്ടുകാരുമായി കളിച്ചുകൊണ്ടിരുന്ന അഭിജിത്തിനെ തെരുവുനായ ആക്രമിക്കുകയായിരുന്നു. മറ്റു കുട്ടികളുടെ നിലവിളി കേട്ട് അതുവഴി കടന്നുപോയ നാട്ടുകാരനാണ് നായയെ വിരട്ടി ഓടിച്ചു കുട്ടിയെ രക്ഷിച്ചത്. ഇരുകാലുകളിലും വയറ്റിലും നെഞ്ചിലും ഉള്‍പ്പടെ ശരീരത്തില്‍ ഏഴോളം മുറിവുകള്‍ ഉണ്ട്.
നെയ്യാറ്റിന്‍കര ആശുപത്രിയില്‍ പ്രവേശിപ്പിച്ച കുട്ടിയെ സ്ഥിതി വഷളായതിനെ തുടര്‍ന്ന് മെഡിക്കല്‍ കോളജിലേക്കു മാറ്റി.