കുമ്പള: റോഡരികിലൂടെ നടന്നു പോവുകയായിരുന്ന രണ്ട് അയ്യപ്പഭക്തരെ ഇടിച്ച ലോറി നിര്‍ത്താതെ പോയി. കുമ്പള കുണ്ടങ്കാരടുക്ക വെല്‍ഫെയര്‍ സ്‌കൂളിന് സമീപത്തെ ബാലകൃഷ്ണ വെളിച്ചപ്പാടന്‍ (56), മുന്ന ഗട്ടിഗ (29) എന്നിവര്‍ക്കാണ് പരുക്കേറ്റത്. ഇരുവരെയും മംഗളുരു ആശുപത്രിയില്‍ പ്രവേശിപ്പിച്ചു. ഇന്നലെ പുലര്‍ച്ചെ അഞ്ചര മണിയോടെ കുമ്പള നിത്യാനന്ദ മഠത്തിന് സമീപമാണ് അപകടം. ശരണം വിളിക്കാന്‍ ക്ഷേത്രത്തിലേക്ക് നടന്ന് പോകുന്നതിനിടെ കാസര്‍കോട് ഭാഗത്തേക്ക് പോവുകയായിരുന്ന ലോറി ഇടിക്കുകയായിരുന്നു. അപകടം വരുത്തിയ ലോറി നിര്‍ത്താതെ പോയി. റോഡിന്റെ ഒരു ഭാഗത്ത് രക്തം വാര്‍ന്ന നിലയില്‍ കണ്ട ഇരുവരെയും നാട്ടുകാര്‍ ആശുപത്രിയില്‍ എത്തിക്കുകയായിരുന്നു. കുമ്പള പൊലിസ് കേസെടുത്ത് അന്വേഷണം തുടങ്ങി.