പാലക്കാട്: സംസ്ഥാനത്ത് വിവിധ വകുപ്പുകളില്‍ ഡ്രൈവര്‍ തസ്തികയുടെ ഒഴിവുകള്‍ ആയിരത്തിലധികം ഉണ്ടായിട്ടും ദിവസവേതനക്കാരെ നിയമിച്ച് പ്രസ്തുത ഒഴിവുകള്‍ പി.എസ്.സിയെ അറിയിക്കാതെ വകുപ്പ് മേധാവികള്‍ മുഖ്യമന്ത്രിയുടെ ഒഴിവുകള്‍ റിപ്പോര്‍ട്ട് ചെയ്യണമെന്ന പ്രഖ്യാപനത്തെ അട്ടിമറിക്കുന്നു. പാലക്കാട് ജില്ലയില്‍ മാത്രം ഇത്തരത്തില്‍ 100 ലധികം ഒഴിവുകളാണുള്ളത്. എന്നാല്‍ റിപ്പോര്‍ട്ട് ചെയ്തിരിക്കുന്നതാകട്ടെ 23 എണ്ണത്തില്‍ മാത്രവും. ശേഷിക്കുന്നവയിലെല്ലാം ദിവസവേതനത്തിന് ജീവനക്കാരെ നിയമിച്ചിരിക്കുകയാണ് വകുപ്പ് മേധാവികള്‍. ദിവസവേതനക്കാരാകുമ്പോള്‍ വീട്ടിലേക്ക് കൂടി ജീവനക്കാരുടെ സേവനം ലഭ്യമാകുമെന്നതുകൊണ്ടാണ് ഒഴിവുകള്‍ റിപ്പോര്‍ട്ട് ചെയ്യാതെ സര്‍ക്കാരില്‍ നിന്നും പി.എസ്.സിയില്‍ മറച്ചുവെക്കുന്നതെന്ന് എല്‍.ഡി.വി ഡ്രൈവര്‍ ഗ്രേഡ് 2 റാങ്ക് ഹോള്‍ഡേഴ്‌സ് അസോസിയേഷന്‍ നേതാക്കള്‍ കുറ്റപ്പെടുത്തുന്നു.
പിണറായി സര്‍ക്കാര്‍ അധികാരത്തില്‍ വന്നശേഷം ആദ്യം ചേര്‍ന്ന മന്ത്രിസഭായോഗത്തില്‍ തന്നെ ഒഴിവുകള്‍ സമയബന്ധിതമായി പി.എസ്.സിയിലേക്ക് റിപ്പോര്‍ട്ട് ചെയ്യണമെന്ന് വകുപ്പ് മേധാവികളോട് നിര്‍ദേശിക്കാന്‍ തീരുമാനിച്ചിരുന്നു. ഇക്കാര്യങ്ങള്‍ നടപ്പിലാകുന്നുണ്ടെന്ന് ഉറപ്പുവരുത്താന്‍ ചീഫ് സെക്രട്ടറിയേയും മന്ത്രിസഭായോഗം ചുമതലപ്പെടുത്തി. ഒഴിവുകള്‍ ബന്ധപ്പെട്ട ഉദ്യോഗസ്ഥര്‍ പി.എസ്.സിയെ അറിയിക്കാതിരുന്നാല്‍ പ്രസ്തുത ഉദ്യോഗസ്ഥനില്‍ നിന്നും സേവനാവകാശ നിയമം വ്യവസ്ഥ ചെയ്യുന്ന പിഴ ഈടാക്കാനും സര്‍ക്കാര്‍ തീരുമാനമെടുത്തിരുന്നു.
ഇതിനെയെല്ലാം മറികടന്നാണ് ഉദ്യോഗസ്ഥര്‍ ഇക്കാര്യത്തില്‍ തന്നിഷ്ടത്തോടെ പ്രവര്‍ത്തിക്കുന്നതെന്നും എല്‍.ഡി.വി ഡ്രൈവര്‍ ഗ്രേഡ് 2 റാങ്ക് ഹോള്‍ഡേഴ്‌സ് അസോസിയേഷന്‍ നേതാക്കള്‍ കുറ്റപ്പെടുത്തി. എല്‍.ഡി.വി ഡ്രൈവര്‍ ഗ്രേഡ് രണ്ട് ഗ്രേഡിലേക്ക് പാലക്കാട് ജില്ലയില്‍ നിന്നുമാത്രം 350 ലധികം ഉദ്യോഗാര്‍ഥികളാണ് നിയമനം കാത്തിരിക്കുന്നത്. റാങ്ക് ലിസ്റ്റിന്റെ കാലാവധി ഏതാണ്ട് തീരാറായിട്ടുമുണ്ട്. ഇക്കാര്യത്തില്‍ എല്‍.ഡി.വി ഡ്രൈവര്‍ ഗ്രേഡ് രണ്ട് റാങ്ക് ഹോള്‍ഡേഴ്‌സ് അംഗങ്ങള്‍ പാലക്കാട് മോയന്‍സ് സ്‌കൂളില്‍ പ്രതിഷേധ യോഗം ചേര്‍ന്നു. യോഗത്തില്‍ ഗോപാലകൃഷ്ണന്‍, എ. മുഹമ്മദ്, സതീശന്‍, സി ആന്റണി, അന്‍വര്‍ പുലാപ്പറ്റ പ്രസംഗിച്ചു.