ശാസ്താംകോട്ട: കുന്നത്തൂര്‍ നിയോജക മണ്ഡലത്തില്‍ മഴയെ അവഗണിച്ചും കനത്ത പോളിങ്. രാവിലെ മുതല്‍ മൂടികെട്ടിയ അന്തരീക്ഷത്തിലും ഉച്ചക്കുശേഷം ഉണ്ടായ ശക്തമായ മഴയേയും അവഗണിച്ച് സ്ത്രീകള്‍ അടക്കമുള്ളവോട്ടര്‍മാര്‍ കൂട്ടത്തോടെ പോളിങ് സ്‌റ്റേഷനുകളിലേക്ക് എത്തുകയായിരുന്നു. പലയിടത്തും രാവിലെ മുതല്‍ തന്നെ നീണ്ട ക്യൂ ദൃശ്യമായിരുന്നു. 80 ശതമാനത്തിനുമുകളില്‍ വോട്ട് രേഖപ്പെടുത്തിയ ബൂത്തുകള്‍ നിരവധിയാണ്. കുന്നത്തൂര്‍ നിയോജക മണ്ഡലത്തിലെ 10 പഞ്ചായത്തുകളിലുമായി ആകെ 73.8 ശതമാനം പോളിംഗ് ആണ് രേഖപ്പെടുത്തിയത്.
ജില്ലയില്‍ ഏറ്റവും കൂടുതല്‍ വോട്ടര്‍മാരുള്ള നിയോജകമണ്ഡലമാണ് കുന്നത്തൂര്‍-207296. ഇതില്‍ 99443 പുരുഷവോട്ടര്‍മാരും 107853 സ്ത്രീവോട്ടര്‍മാരുമാണ് ഉള്ളത്. സ്ത്രീ വോട്ടര്‍മാര്‍ കൂടുതല്‍ ഉള്ളതും കുന്നത്തൂരിലാണ്. കശുവണ്ടി തൊഴിലാളികളുടെ സാന്നിധ്യവും ഇവിടെ വലുതാണ്. കുന്നത്തൂരിലെ യു.ഡി.എഫ് സ്ഥാനാര്‍ഥി ഉല്ലാസ് കോവൂരും  തേവലക്കര ബോയ്‌സ് ഹൈസ്‌കൂളില്‍ വോട്ട് രേഖപ്പെടുത്തിയ ശേഷം മണ്ഡലത്തിലെ ബൂത്തുകളില്‍ സന്ദര്‍ശനം നടത്തി. എല്‍.ഡി.എഫ് സ്ഥാനാര്‍ഥി കോവൂര്‍ കുഞ്ഞുമോനും ഇതേ സ്‌കൂളില്‍ തന്നെയാണ് വോട്ട് രേഖപ്പെടുത്തിയത്. എന്‍.ഡി.എ സ്ഥാനാര്‍ഥി തഴവാ സഹദേവന്‍ കരുനാഗപ്പള്ളി നിയോജകമണ്ഡലത്തിലെ ആദിത്യവിലാസം സ്‌കൂളില്‍ രാവിലെതന്നെ വോട്ടുരേഖപ്പെടുത്തി. ചെങ്ങന്നൂരിലെ യു.ഡി.എഫ് സ്ഥാനാര്‍ഥി പി.സി.വിഷ്ണുനാഥ് എം.എല്‍.എ രാവിലെ തന്നെ വോട്ടുചെയ്യാന്‍കുന്നത്തൂരിലെത്തിയിരുന്നു. അദ്ദേഹത്തിന്റെ സ്വന്തം ബൂത്തായ ശാസ്താംകോട്ട എച്ച്.എസ്.എസിലെ 66-ാംനമ്പര്‍ബൂത്തില്‍ രാവിലെ 7.20ന് വോട്ടുരേഖപ്പെടുത്തി. സഹോദരി വീണാറാണിയും ഒപ്പമുണ്ടായിരുന്നു.