ഹരാരെ: സിംബാബ്‌വെക്കെതിരായ ഒന്നാം ക്രിക്കറ്റ് ടെസ്റ്റില്‍ ശ്രീലങ്കക്ക് 225 റണ്‍സിന്റെ കൂറ്റന്‍ ജയം. 411 റണ്‍സ് വിജയ ലക്ഷ്യം പിന്തുടര്‍ന്ന സിംബാബ്‌വെയുടെ പോരാട്ടം 186 റണ്‍സില്‍ അവസാനിച്ചു. ആദ്യ ഇന്നിങ്‌സില്‍ ശ്രീലങ്ക 537 റണ്‍സും രണ്ടാമിന്നിങ്‌സില്‍ ആറിനു 247 റണ്‍സെന്ന നിലയില്‍ ഡിക്ലയറും ചെയ്തു. സിംബാബ്‌വേ ആദ്യ ഇന്നിങ്‌സില്‍ 373 റണ്‍സെടുത്തു ഫോളോ ഓണ്‍ ഒഴിവാക്കിയിരുന്നെങ്കിലും രണ്ടാമിന്നിങ്‌സില്‍ സിംബാബ്‌വേ ബാറ്റിങ് നിരയ്ക്കു പിടിച്ചു നില്‍ക്കാന്‍ സാധിച്ചില്ല.
ആദ്യ ഇന്നിങ്‌സില്‍ സെഞ്ച്വറി നേടി പുറത്താകാതെ നിന്ന നായകന്‍ ക്രെമര്‍ രണ്ടാം ഇന്നിങ്‌സിലും ടോപ് സ്‌കോററായി. 43 റണ്‍സാണ് നായകന്‍ സ്വന്തമാക്കിയത്. വില്ല്യംസ് (40), ഓപണര്‍ മവോയോ (37) എന്നിവരും മികവു പുലര്‍ത്തി. മറ്റൊരു താരത്തിനും പിടിച്ചു നില്‍ക്കാന്‍ സാധിച്ചില്ല. ലങ്കക്കായി ഹെറാത്ത്, പെരേര എന്നിവര്‍ മൂന്നും ലക്മല്‍, കുമാര എന്നിവര്‍ രണ്ടു വീതവും വിക്കറ്റുകള്‍ വീഴ്ത്തി. നേരത്തെ കരുണ രത്‌നെയുടെ സെഞ്ച്വറിയാണ് (110) രണ്ടാമിന്നിങ്‌സില്‍ ലങ്കയ്ക്ക് കരുത്തായത്. ഓള്‍ റൗണ്ട് പ്രകടനം നടത്തിയ ക്രെമറാണ് കളിയിലെ കേമന്‍.