നീലേശ്വരം: കഴിഞ്ഞ മാസം 20 മുതല്‍ 30 വരെ ഒറീസയില്‍ നടന്ന എന്‍.സി.സി ദേശീയോദ്ഗ്രഥന ക്യാംപില്‍ കേരള ഡയറക്ടറേറ്റിനെ പ്രതിനിധീകരിച്ചു പങ്കെടുത്ത എന്‍.സി.സി 32 കേരള ബറ്റാലിയന്റെ കീഴിലുള്ള കാഞ്ഞങ്ങാട് നെഹ്‌റു ആര്‍ട്‌സ് ആന്‍ഡ് സയന്‍സ് കോളജിലെ എന്‍.സി.സി കാഡറ്റ് എസ് തന്‍മയിക്ക് മികച്ച അഭിമാനാര്‍ഹമായ നേട്ടം. ഇന്ത്യയിലെ വിവിധ സംസ്ഥാനങ്ങളെ പ്രതിനിധീകരിച്ച് പങ്കെടുത്ത എന്‍.സി.സി കാഡററുകളില്‍ ഏററവും നല്ല 'മാസ്റ്റര്‍ ഓഫ് സെറിമണി' ആയി തിരഞ്ഞെടുക്കപ്പെട്ട തന്‍മയിക്ക് ദേശീയോദ്ഗ്രഥന ബോധവല്‍ക്കരണ പരിപാടിയില്‍ ഗ്രൂപ്പിനത്തില്‍ രണ്ടാം സ്ഥാനവും ഗ്രൂപ്പ് ഡാന്‍സില്‍ മൂന്നാം സ്ഥാനവും ലഭിച്ചു.
എസ്.ബി.ടി പാലക്കാട് അസിസ്റ്റന്റ് മാനേജര്‍ വി.ടി സുധാകരന്‍, മുത്തൂറ്റ് ഫിന്‍കോര്‍പ്പ് കാഞ്ഞങ്ങാട് ബ്രാഞ്ച് മാനേജര്‍ എ ശുഭശ്രീ ദമ്പതികളുടെ മകളായ തന്‍മയി കാഞ്ഞങ്ങാട് സ്വദേശിനിയാണ്. അഭിമാനാര്‍ഹമായ നേട്ടം കൈവരിച്ച തന്‍മയിയെ പ്രിന്‍സിപ്പല്‍ ഡോ. പി.വി പുഷ്പജ, അസോസിയേറ്റ് എന്‍.സി.സി ഓഫിസര്‍ ലഫ്റ്റനന്റ് നന്ദകുമാര്‍ കോറോത്ത് എന്നിവര്‍ അഭിനന്ദിച്ചു.