നെടുമ്പാശ്ശേരി: അത്താണി ദേശീയ പാതക്കരികില്‍ ആധുനിക രീതിയില്‍ പണികഴിപ്പിച്ച ബസ് കാത്തുനില്‍പ്പ് കേന്ദ്രം ഇന്നസെന്റ് എം.പി ഉദ്ഘാടനം ചെയ്തു. എം.പിയുടെ പ്രാദേശിക വികസന ഫണ്ടില്‍ ഉള്‍പ്പെടുത്തിയാണ് കേന്ദ്രം നിര്‍മ്മിച്ചത്. നാല് ലക്ഷം രൂപ ചിലവില്‍ നിര്‍മിച്ച ബസ് കാത്ത് നില്‍പ്പ് കേന്ദ്രത്തില്‍ മൊബൈല്‍ ചാര്‍ജ് ചെയ്യാനുള്ള സൗകര്യം, എഫ്.എം റേഡിയോ, രാത്രിയില്‍ വെളിച്ചം ലഭിക്കാനുള്ള സൗകര്യം എന്നിവയും ക്രമീകരിച്ചിട്ടുണ്ട്.
നെടുമ്പാശ്ശേരി പഞ്ചായത്ത് പ്രസിഡന്റ് മിനി എല്‍ദോ അധ്യക്ഷയായിരുന്നു. വൈസ് പ്രസിഡന്റ് പി.സി സോമശേഖരന്‍, അംഗങ്ങളായ എന്‍.വി ബാബു, അംബിക പ്രകാശന്‍, ആനി കുഞ്ഞ്‌മോന്‍, മുന്‍ പഞ്ചായത്ത് പ്രസിഡന്റ്മാരായ പി.വൈ വര്‍ഗ്ഗീസ്, തമ്പി പോള്‍, പി.വി പൗലോസ് തുടങ്ങിയവര്‍ സംസാരിച്ചു.