റിയാദ്: റിയാദില്‍ മലപ്പുറം സ്വദേശിയെ കൊള്ളസംഘം വെട്ടി പരിക്കേല്‍പ്പിച്ച് കവര്‍ച്ചാ ശ്രമം. മലപ്പുറം തിരൂര്‍ സ്വദേശി അലിയെയാണ് ഒരു സംഘം കവര്‍ച്ചക്കാര്‍ വെട്ടിപരിക്കേല്‍പിച്ചത്. പ്ലാസ്റ്റിക് സാധനങ്ങള്‍ ഓര്‍ഡര്‍ പ്രകാരം കടകളില്‍ എത്തിച്ചു നല്‍കുന്ന ഇദ്ദേഹം ബദിയയില്‍ വെച്ചാണ് കഴിഞ്ഞ ദിവസം ആക്രമണത്തിനിരയായത്.

കടയില്‍ നിന്നും ഓര്‍ഡര്‍ സ്വീകരിച്ച് പുറത്തിറങ്ങുന്നതിനിടെ കാറിലെത്തിയ മൂന്നംഗ അറബ് വംശജര്‍ തടഞ്ഞു നിര്‍ത്തി ഇദ്ദേഹത്തിന്റെ പേഴ്‌സ് തട്ടിപ്പറിക്കാന്‍ ശ്രമിക്കുകയായിരുന്നു. എന്നാല്‍ അലി ഇവരെ പ്രതിരോധിച്ചതോടെ തുരുതുരാ വെട്ടുകയായിരുന്നു. ഇതിനിടെ അപ്രതീക്ഷിതമായെത്തിയ സ്വദേശി ഇവരുടെ കണ്ണില്‍ പെട്ടതിനെ തുടര്‍ന്ന് അക്രമികള്‍ ഓടി രക്ഷപ്പെട്ടു. സ്വദേശി പോലീസില്‍ വിവരമറിയിച്ചതിനെ തുടര്‍ന്ന് പൊലിസെത്തിയാണ് തലക്കും കൈക്കും കാലിനും വെട്ടേറ്റ ഇദ്ദേഹത്തെ ബദിയ ആശുപത്രിയില്‍ പ്രവേശിപ്പിച്ചത്.