വഴിക്കടവ്: വീടിനുള്ളില്‍ കയറിയ രാജവെമ്പാലയെ പിടികൂടി. മരുതയിലെ വേങ്ങാപാടത്തെ തറ മണ്ണില്‍ മുഹമ്മദിന്റെ വീടിനുള്ളിലെ കിടപ്പുമുറിയിലെ റാക്കിലാണു പാമ്പ് കയറിക്കൂടിയത്. വിവാഹം നടക്കുന്ന അയല്‍പക്കത്തെ വീടിന്റെ മുറ്റത്തൂടെ അരിച്ചെത്തിയ പാമ്പ് കിടപ്പു മുറിയിലേക്കു ജനല്‍ വഴി കയറുകയായിരുന്നു. ആളുകളെത്തിയതോടെ പാമ്പ് റാക്കിലിരുന്ന പാത്രത്തിനുള്ളില്‍ കയറി ഒളിച്ചിരിക്കുകയായിരുന്നു. ഇന്നലെ ഉച്ചയോടെയാണു സംഭവം. പാമ്പ് പിടുത്ത വിദഗ്ധനായ പില്ലാത്തൊടിക മുജീബ് റഹ്മാനെത്തി രാജവെമ്പാലയെ പിടികൂടിയത്. ആറു മാസത്തിനുള്ളില്‍ പത്തിലധികം രാജവെമ്പാലകളെയാണു മുജീബ് റഹ്മാന്‍ പിടികൂടിയത്.
മേഖലയില്‍ വര്‍ധിച്ചുവരുന്ന രാജവെമ്പാല ഭീതി സൃഷ്ടിക്കുന്നുണ്ട്. 10 ദിവസത്തിനുള്ളില്‍ മുന്നോളം രാജവെമ്പാലകളെയാണു വഴിക്കടവിനു സമീപ പ്രദേശങ്ങളില്‍ നിന്നും പിടികൂടിയത്.