നിലമ്പൂര്‍: സംസ്ഥാനത്തെ എ.ടി.എം തട്ടിപ്പുകേസുകള്‍ അന്വേഷിക്കുന്നതിനു പ്രത്യേക സംഘം രൂപീകരിക്കാന്‍ പൊലിസ് ഉന്നത ഉദ്യോഗസ്ഥരുടെ തീരുമാനം. നിലമ്പൂര്‍ എ.ടി.എം തട്ടിപ്പു കേസിലെ പ്രതികളെ ഝാര്‍ഖണ്ഡില്‍നിന്ന് അറസ്റ്റ് ചെയ്തു കേരളത്തിലെത്തിച്ച സാഹചര്യത്തില്‍ മറ്റുള്ള സമാന കേസുകളിലും നടപടി വേഗത്തിലാക്കാന്‍ പ്രത്യേക അന്വേഷണ സംഘം രൂപീകരിക്കണമെന്നാണ് മലപ്പുറം ജില്ലാ പൊലിസ് മേധാവി ഡി.ജി.പിക്കു നല്‍കിയ റിപ്പോര്‍ട്ടില്‍ ആവശ്യപ്പെട്ടിട്ടുള്ളത്.
പണമായല്ല എ.ടി.എമ്മില്‍നിന്നു പ്രതികള്‍ പണം തട്ടിയെടുത്തത്. ഓണ്‍ലൈന്‍ പര്‍ച്ചേസിലൂടെയാണ് തട്ടിപ്പ് നടത്തിയത്. എ.ടി.എം കാര്‍ഡ് നമ്പര്‍, രഹസ്യ പിന്‍ നമ്പര്‍ എന്നിവ മനസിലാക്കിയ ശേഷം ഈ നമ്പറുകളുള്ള കാര്‍ഡ് ഉപയോഗിച്ച് ഓണ്‍ലൈന്‍വഴി പര്‍ച്ചേസ് നടത്തും. ഓണ്‍ലൈനിലുള്ള ഫ്‌ളിപ്കാര്‍ട്ട്, സ്‌നാപ്പ് ഡീല്‍, മന്ത്ര തുടങ്ങിയ വന്‍കിട ഓണ്‍ലൈന്‍ കമ്പനികള്‍ വഴിയാണ് കച്ചവടം നടന്നിട്ടുള്ളത്. ഝാര്‍ഖണ്ഡിലെ ജംഥാര, ധന്‍ബാദ് ജില്ലകളില്‍ നൂറ് കണക്കിന് യുവാക്കള്‍ രാജ്യത്തെ വിവിധ സംസ്ഥാനങ്ങളിലെ ആയിരക്കണക്കിനാളുകളുടെ പണമാണ് വെട്ടിപ്പ് നടത്തിക്കൊണ്ടിരിക്കുന്നത്.