തൊടുപുഴ: ജില്ലാ സഹകരണ ബാങ്ക് ഭരണസമിതികള്‍ പിരിച്ചുവിടാനുള്ള സര്‍ക്കാര്‍ നീക്കത്തിനെതിരേ പ്രതിപക്ഷം നിയമസഭയില്‍ ശക്തമായ പ്രക്ഷോഭം സ്വീകരിക്കുമ്പോഴും പിരിച്ചുവിടല്‍ നടപടികള്‍ അവസാനഘട്ടത്തില്‍. ജില്ലകളില്‍ സര്‍ക്കാര്‍ നിയോഗിച്ച പത്തംഗ പ്രത്യേക സംഘം നടത്തിയ പരിശോധനകള്‍ പൂര്‍ത്തിയായി. ജോയിന്റ് രജിസ്ട്രാര്‍മാര്‍ (ജനറല്‍) ഇന്നു സഹകരണസംഘം രജിസ്ട്രാര്‍ക്കു റിപ്പോര്‍ട്ട് കൈമാറും. 16 പരിഗണനാ വിഷയങ്ങളുടെ അടിസ്ഥാനത്തിലാണു റിപ്പോര്‍ട്ട് തയ്യാറാക്കിയത്.
14 ജില്ലാ സഹകരണ ബാങ്കുകളിലും ക്രമക്കേടു കണ്ടെത്തിയിട്ടുണ്ട്. പര്‍ച്ചേസിങുമായി ബന്ധപ്പെട്ടാണു പ്രധാനമായും ക്രമക്കേട്. സഹകരണ വകുപ്പിന്റെ മുന്‍കൂര്‍ അനുമതിയില്ലാതെയാണു പല പര്‍ച്ചേസുകളും നടത്തിയിരിക്കുന്നത്. ഇതുതന്നെ സഹകരണ ചട്ടത്തിനും നിയമത്തിനും എതിരാണ്. ഇക്കാരണം മാത്രംമതി ഭരണസമിതികള്‍ പിരിച്ചുവിടാന്‍. ജില്ലാ സഹകരണ ബാങ്കുകളില്‍ നാളുകളായി പരിശോധനകള്‍ ഒന്നും നടക്കുന്നില്ല. അതിനാല്‍ത്തന്നെ നിരവധി ക്രമക്കേടുകള്‍ കണ്ടെത്താന്‍ കഴിഞ്ഞിട്ടുണ്ട്.
ചോദ്യാവലിയുടെ അടിസ്ഥാനത്തില്‍ നടത്തിയ പരിശോധനകള്‍ റിസര്‍വ് ബാങ്ക് ഓഫ് ഇന്ത്യയുടെ സര്‍ക്കുലറിന് എതിരാണെന്ന് പ്രതിപക്ഷം വാദിക്കുന്നു. മ്യൂച്ചല്‍ ഫണ്ടുകള്‍ നടത്തുന്നതു റിസര്‍വ് ബാങ്ക് ലൈസന്‍സിന്റെ അടിസ്ഥാനത്തിലാണെന്നും അവര്‍ പറയുന്നു. അതിനാല്‍ ബാങ്കുകള്‍ പിരിച്ചുവിടാനുള്ള ഭരണപക്ഷത്തിന്റെ തന്ത്രപരമായ നീക്കം നിയമപരമായി ചോദ്യം ചെയ്യുമെന്ന് ജില്ലാ സഹകരണ ബാങ്ക് പ്രസിഡന്റുമാരുടെ കോ ഓഡിനേഷന്‍ കമ്മിറ്റി അധ്യക്ഷനും എറണാകുളം ജില്ലാ സഹകരണ ബാങ്ക് പ്രസിഡന്റുമായ എന്‍.പി പൗലോസ് പറഞ്ഞു. എന്നാല്‍, ഇപ്പോള്‍ നടത്തിയ പരിശോധനകള്‍ മുന്‍ തീരുമാനപ്രകാരമാണെന്നും രാഷ്ട്രീയപ്രേരിതമല്ലെന്നും സഹകരണ സംഘം രജിസ്ട്രാര്‍ എസ്. ലളിതാംബിക ഐ.എ.എസ് സുപ്രഭാതത്തോടു പറഞ്ഞു.
അതേസമയം ജില്ലാ സഹകരണ ബാങ്കുകള്‍ സംയോജിപ്പിച്ചു കേരളാ ബാങ്ക് രൂപീകരണവുമായി ബന്ധപ്പെട്ട നടപടിക്രമങ്ങള്‍ ദ്രുതഗതിയില്‍ പുരോഗമിക്കുകയാണ്. ഇതുസംബന്ധിച്ചു ജില്ലാ ബാങ്ക് ഭരണസമിതികളുടെ അഭിപ്രായം ആരായാന്‍ സഹകരണ സംഘം രജിസ്ട്രാര്‍ എസ്. ലളിതാംബിക എല്ലാ ജില്ലകളും പര്യടനം നടത്തുകയാണ്. ചൊവ്വാഴ്ച ഇടുക്കി, പത്തനംതിട്ട ജില്ലകളിലായിരുന്നു രജിസ്ട്രാറുടെ സന്ദര്‍ശനം. തിങ്കളാഴ്ച ആലപ്പുഴ, എറണാകുളം ജില്ലകള്‍ സന്ദര്‍ശിച്ചു. പാലക്കാട് ഒഴികെ 13 ജില്ലാ ബാങ്കുകളും നിലവില്‍ യു.ഡി.എഫ് ഭരണത്തിലാണ്. ബാങ്ക് സംയോജനത്തിനു യു.ഡി.എഫ് എതിരാണ്. അതിനാല്‍ എത്രയും വേഗം ഭരണസമിതികള്‍ പിരിച്ചുവിട്ടു ജില്ലാ ബാങ്കുകള്‍ സി.പി.എം വരുതിയാലാക്കാനാണു നീക്കം. ജില്ലാ ബാങ്കുകളിലെ ക്രമക്കേടുകള്‍ സംബന്ധിച്ചു നിരവധി പരാതികള്‍ ലഭിച്ച സാഹചര്യത്തിലാണു പരിശോധനയ്ക്കായി പ്രത്യേക സംഘത്തെ നിയോഗിച്ചതെന്നു സഹകരണ വകുപ്പ് മന്ത്രി എ.സി മൊയ്തീന്‍ നിയമസഭയില്‍ പറഞ്ഞിരുന്നു. എന്നാല്‍, പരാതികള്‍ പലതും കെട്ടിച്ചമച്ചതാണെന്നാണു പ്രതിപക്ഷം ആരോപിക്കുന്നത്.