കരുവാരകുണ്ട്: കരുവാരകുണ്ട് ദാറുന്നജാത്ത് അറബിക് ആര്‍ട്‌സ് കോളജ് വിദ്യാര്‍ഥികള്‍ കലാലയമുറ്റത്തു ശാസ്ത്രീയ കൃഷിയൊരുക്കുന്നു. കാംപസിലെ വിശാലമയ ഭൂമിയിലാണ് അത്യാധുനിക രീതിയില്‍ കൃഷിയിറക്കുന്നത്. സംസ്ഥാന കാര്‍ഷിക വികസനക്ഷേമ വകുപ്പിന്റെ സാമ്പത്തിക സഹായത്തോടെ കരുവാരകുണ്ട് കൃഷിഭവനുമായി ചേര്‍ന്നാണ് പദ്ധതി.
ഒരേക്കറോളം വരുന്ന സ്ഥലത്തു നടപ്പാക്കുന്ന കാര്‍ഷിക പദ്ധതിയുടെ എല്ലാ പ്രവര്‍ത്തനങ്ങളും ഇതിനകം പൂര്‍ത്തിയായി. കള വരാതിരിക്കാനും മറ്റുമായി നൂതന മാര്‍ഗങ്ങളൊരുക്കിയാണ് മള്‍ചിങ്, ഡ്രിപ്പ് ഇറിഗേഷന്‍, വെഞ്ച്വറി എന്നീ ഇനങ്ങളിലായി കൃഷിയിടമൊരുക്കുന്നത്. കോളജ് എന്‍.എസ്.എസ് യൂനിറ്റിനു കീഴില്‍ ഔഷധത്തോട്ടവുമൊരുക്കിയിട്ടുണ്ട്.
പദ്ധതിയുടെ വിത്തുനടീല്‍ ഉദ്ഘാടനം ഇന്നു രാവിലെ പതിനൊന്നിന് എ.പി അനില്‍കുമാര്‍ എം.എല്‍.എ നിര്‍വഹിക്കും. പഞ്ചായത്ത് പ്രസിഡന്റ് കെ. മുഹമ്മദ് മാസ്റ്റര്‍ അധ്യക്ഷനാകും. പ്രിന്‍സിപ്പല്‍ കെ. അബ്ദുല്‍ മജീദ്, എന്‍.എസ്.എസ് പ്രോഗ്രാം ഓഫിസര്‍ മുഹമ്മദ് അസ്‌ലം, കെ.ടി റസാഖ്, എം. ഹുസ്സന്‍, പി. ഷൗക്കത്തലി എന്നിവര്‍ നേതൃത്വം നല്‍കും.