കൊച്ചി: ദേശിയ പാതാ അതോറിറ്റിയില്‍ നിന്നും ഭരണാനുമതിയും സാങ്കേതികാനുമതിയും അടിയന്തിരമായി ലഭ്യമാക്കി കുണ്ടന്നൂര്‍, വൈറ്റില ഫ്‌ളൈ ഓവറുകളുടെ നിര്‍മാണം രണ്ട് മാസത്തിനകം ആരംഭിക്കണമെന്ന് സംസ്ഥാന മനുഷ്യാവകാശ കമ്മീഷന്‍. എത്രയും വേഗം നിര്‍മാണം പൂര്‍ത്തിയാക്കണമെന്നും ഉത്തരവില്‍ പറയുന്നു.
കമ്മിഷന്‍ ആക്റ്റിങ് ചെയര്‍പേഴ്‌സന്‍ പി മോഹനദാസ് പൊതുമരാമത്ത് വകുപ്പ് അഡീഷണല്‍ ചീഫ് സെക്രട്ടറിക്കും ദേശീയ പാതാ അതോറിറ്റി എക്‌സിക്യൂട്ടീവ് എഞ്ചിനീയര്‍ക്കുമാണ് നിര്‍ദ്ദേശം നല്‍കിയിരിക്കുന്നത്. നടപടി റിപ്പോര്‍ട്ട് മൂന്ന് മാസത്തിനകം സമര്‍പ്പിക്കണം. കേസ് ഫെബ്രുവരിയില്‍ എറണാകുളത്ത് നടക്കുന്ന സിറ്റിംഗില്‍ പരിഗണിക്കും. കൊച്ചി നഗരസഭാംഗവും മനുഷ്യാവകാശ പ്രവര്‍ത്തകനുമായ തമ്പി സുബ്രഹ്മണ്യന്‍ സമര്‍പ്പിച്ച പരാതിയിലാണ് കമ്മിഷന്റെ ഇടക്കാല ഉത്തരവ്.
വൈറ്റില ജംഗ്ഷനിലെ ഫ്‌ളൈഓവറിന് 108 കോടിയുടെ ഭരണാനുമതി നല്‍കിയതായി പൊതുമരാമത്ത് അഡീഷണല്‍ ചീഫ് സെക്രട്ടറി കമ്മിഷനെ അറിയിച്ചു. കുണ്ടന്നൂര്‍ ജംഗ്ഷനിലെ ഫ്‌ളൈഓവര്‍ നിര്‍മ്മാണത്തിന് 80.20 കോടി രൂപയുടെ ഭരണാനുമതി ലഭിച്ചിട്ടുണ്ട്. വൈറ്റില, കണ്ടന്നൂര്‍ ഫ്‌ളൈഓവറുകളുടെ നിര്‍മ്മാണ പദ്ധതിയുടെ ചില പ്രവര്‍ത്തനങ്ങള്‍ ടെന്റര്‍ ചെയ്തു.
മനുഷ്യാവകാശ കമ്മിഷന്‍ ആക്റ്റിംഗ് ചെയര്‍പേഴ്‌സന്‍ പി മോഹനദാസ് ഇന്ന് രാവിലെ 10 ന് കാക്കനാട് കലക്ടറേറ്റ് കോണ്‍ഫറന്‍സ് ഹാളില്‍ സിറ്റിംഗ് നടത്തുമെന്ന് കമ്മിഷന്‍ അറിയിച്ചു.