നെടുമ്പാശ്ശേരി: നെടുമ്പാശ്ശേരി അന്താരാഷ്ട്ര വിമാനത്താവളത്തില്‍ നിന്നും പറന്നുയര്‍ന്ന വിമാനം യന്ത്രത്തകരാറിനെ തുടര്‍ന്ന് ഒരു മണിക്കൂറിനു ശേഷം അടിയന്തിരമായി തിരിച്ചിറക്കി. ഇന്നലെ വൈകിട്ട് 4.25 ന് അന്താരാഷ്ട്ര ടെര്‍മിനലില്‍ നിന്നും കൊളംബോയിലേക്ക് പുറപ്പെട്ട ശ്രീലങ്കന്‍ എയര്‍ലൈന്‍സിന്റെ യു.എന്‍ 168 നമ്പര്‍ വിമാനമാണ് യന്ത്രത്തകരാറ് ശ്രദ്ധയില്‍പെട്ടതിനെ തുടര്‍ന്ന് ഒരു മണിക്കൂറിനു ശേഷം 5.25 ന് നെടുമ്പാശ്ശേരിയില്‍ അടിയന്തിര ലാന്റിങ് നടത്തിയത്.

തകരാര്‍ ശ്രദ്ധയില്‍പ്പെട്ട ഉടനെ തന്നെ വിമാനം അടിയന്തിര ലാന്റിങ് നടത്തുകയാണെന്ന് പൈലറ്റ് എയര്‍ കണ്‍ട്രോള്‍ റൂമിലേക്ക് സന്ദേശം അയക്കുകയായിരുന്നു. ഉടനെ തന്നെ വിമാനത്താവളത്തില്‍ ജാഗ്രതാ നിര്‍ദ്ദേശം നല്‍കി പ്രത്യേക സൗകര്യങ്ങള്‍ ഒരുക്കിയിരുന്നു. 161 യാത്രക്കാരും 8 വിമാന ജീവനക്കാരുമാണ് വിമാനത്തില്‍ ഉണ്ടായിരുന്നത്.