ബാംഗ്ലൂര്‍: ഐ.പി.എല്ലില്‍ ഇന്നലെ നടന്ന പോരാട്ടത്തില്‍ കിങ്‌സ് ഇലവന്‍ പഞ്ചാബിനെതിരേ റോയല്‍ ചലഞ്ചേഴ്‌സ് ബാംഗ്ലൂരിന് വമ്പന്‍ ജയം. 82 റണ്‍സിനാണ് ചലഞ്ചേഴ്‌സ് ജയിച്ചത്. മഴ മൂലം കളി മുടക്കിയ മത്സരം 15 ഓവറാക്കി ചുരുക്കുകയായിരുന്നു. നിശ്ചിത ഓവറില്‍ മൂന്നിന് 211 റണ്‍സാണ് ബാംഗ്ലൂര്‍ വാരിയത്.

നായകന്‍ വിരാട് കോഹ്‌ലി(113)യുടെ സെഞ്ച്വറിയാണ് ടീമിന് മികച്ച സ്‌കോര്‍ സമ്മാനിച്ചത്. സീസണില്‍ കോഹ്‌ലിയുടെ നാലാം സെഞ്ച്വറിയാണിത്. ക്രിസ് ഗെയ്ല്‍(73) ടീമിനായി മികച്ച പ്രകടനം നടത്തി. കോഹ്‌ലി 50 പന്തില്‍ 12 ബൗണ്ടറിയും എട്ടു സിക്‌സറും പറത്തിയ ശേഷമാണ് ക്രീസ് വിട്ടത്. ഗെയ്ല്‍ 32 പന്തില്‍ എട്ടു സിക്‌സറും നാലു ബൗണ്ടറിയും പറത്തി.

ഐ.പി.എല്‍ ചരിത്രത്തില്‍ 4000 റണ്‍സ് സ്‌കോര്‍ ചെയ്യുന്ന ആദ്യ താരമാവാനും കോഹ്‌ലിക്ക് മത്സരത്തിലൂടെ സാധിച്ചു. ഓപണിങില്‍ കോഹ്‌ലി-ഗെയ്ല്‍ സഖ്യം 11 ഓവറില്‍ നിന്ന് 147 റണ്‍സ് വാരി. മറുപടി ബാറ്റിങ്ങിനിറങ്ങിയ പഞ്ചാബ് 120 റണ്‍സാണ് എടുത്തത്. 24 റണ്‍സെടുത്ത സാഹയാണ് പഞ്ചാബ് നിരയില്‍ ടോപ് സ്‌കോറര്‍ .