മട്ടാഞ്ചേരി: അനിയന്ത്രിത അന്തരീക്ഷ മലിനീകരണ ഭീഷണിയിലേക്ക് കൊച്ചിയും. മലിനീകരണ തോത് കൊച്ചിയുടേത് മുന്നിരട്ടി ഉയര്‍ന്ന നിരക്കിലാണന്നാണ് റിപ്പോര്‍ട്ട്. മലിനീകരണ തോത് നിരീക്ഷിക്കുന്നതിന് വിവിധ നഗരങ്ങളില്‍ അത്യാധുനിക സംവിധാനമൊരുങ്ങുകയാണ്.
ഡല്‍ഹിയിലെ മലിനീകരണ പ്രതിസന്ധിയുടെ പശ്ചാത്തലത്തിലാണ് നിരീക്ഷണ സംവിധാനങ്ങളൊരുങ്ങുന്നത്. ലോകാരോഗ്യ സംഘടന നടത്തിയ സര്‍വേയില്‍ ഇന്ത്യയിലെ 124 നഗരങ്ങളില്‍ കേരളത്തിലെ ഏട്ട് നഗരങ്ങള്‍ അനിയന്ത്രിത മലിനീകരണ ഭീതിയിലാണന്ന് കണ്ടെത്തിയിരുന്നു. ദേശീയ ശരാശരിയെക്കാള്‍ മുന്നിരട്ടി 38 മൈക്രോ ഗ്രാമാണ് കൊച്ചിയുടെ മലിനീകരണതോതെന്ന് കണ്ടെത്തിയിരുന്നു. തിരുവനന്തപുരം 29,കൊല്ലം 22,പത്തനംതിട്ട 22, ആലപ്പുഴ,27 കോഴിക്കോട് 30 മൈക്രോഗ്രാം എന്നിങ്ങനെയാണ് തോത്.
ചെന്നൈ നഗരത്തിന് തൊട്ടടുത്താണ് നിലവിലുള്ള കൊച്ചിയുടെ തോത്. വ്യവസായ മേഖലയും അനിയന്ത്രിത ഖനനങ്ങളും സമുച്ചയങ്ങളും ജലമലിനീകരണവുമെല്ലാം കൊച്ചിയെ മലിനീകരണ ഭീഷണിക്ക് ഇടയാക്കി. മരങ്ങളില്ലാത്തതും മഴ കുറഞ്ഞതും മാലിന്യങ്ങള്‍ കത്തിക്കുന്നതും അത്യുഷ്ണവും മൂലം പൊടിപടലങ്ങളുടെ തോതും വര്‍ധിച്ചു. കഴിഞ്ഞ രണ്ടു ദശാബ്ദങ്ങള്‍ക്കകം 15 ഇരട്ടിയാണ് സംസ്ഥാന നഗരങ്ങളില്‍ മലിനീകരണ വര്‍ധനവിന് കാരണമെന്നാണ് ചുണ്ടിക്കാട്ടുന്നത്.
മലിനീകരണം അനിയന്ത്രിതമായി ഉയരുന്നതോടെയുള്ള പ്രശ്‌ന പ്രതിസന്ധിക്ക് മുന്നോടിയായി നാല് നഗരകേന്ദ്രങ്ങളില്‍ ആധുനിക അന്തരീക്ഷ മലിനീകരണ നിരീക്ഷണ സംവിധാനങ്ങള്‍ സ്ഥാപിക്കാന്‍ കേരളം തയ്യാറെടുക്കുകയാണ്. ഇതിനുള്ള പ്രാരംഭ പരീക്ഷണം കൊച്ചിയില്‍ നടന്നു. അംബിയന്റ് എയര്‍ ക്വാളിറ്റി മോണിറ്ററിങ് സിസ്റ്റമാണ് സ്ഥാപിക്കുക.
ആദ്യഘട്ടത്തില്‍ തിരുവനന്തപുരത്തും കോഴിക്കോടും ഒന്നു വീതവും കൊച്ചിയില്‍ രണ്ടും സിസ്റ്റങ്ങളാണുണ്ടാകുക. വായു മലിനീകരണത്തിലെ രാസപദാര്‍ത്ഥങ്ങളടക്കമുള്ളവയുടെ അളവുകളുടെ മാറ്റങ്ങള്‍ക്കൊപ്പം ശബ്ദമലിനീകരണം,ശരീര ഉഷ്മാവ് ഉഷ്ണമാപിനി,പ്രഷര്‍,മഴയുടെ തോത്, കാറ്റിന്റെ വേഗത ഗതി മാറ്റം തുടങ്ങിയവയും നിരീക്ഷണ സംവിധാനത്തിലൊരുക്കിയിട്ടുണ്ട്.
കൊച്ചിയില്‍ വ്യവസായിക മേഖലയായ ഏലൂരിലും നഗരഹൃദയത്തിലുമാണ് സംവിധാനം സ്ഥാപിക്കുക. 2017 മാര്‍ച്ചിനകം മലിനീകരണ നിരീക്ഷണ സംവിധാനം പ്രവര്‍ത്തനസജ്ജമാക്കണമെന്നാണ് ലക്ഷ്യം. രണ്ടാം ഘട്ടമായി അഞ്ച് കേന്ദ്രങ്ങളിലും നിരീക്ഷണ സംവിധാനമൊരുക്കും.