കോഴിക്കോട്: ജെ.എന്‍.യു വിദ്യാര്‍ഥി നജീബിന്റെ തിരോധാനത്തെ തുടര്‍ന്ന് രാജ്യത്തെ കാംപസുകളില്‍ രൂപപ്പെട്ടിട്ടുള്ള വിദ്യാര്‍ഥി പ്രക്ഷോഭങ്ങള്‍ പൊതുസമൂഹം ഏറ്റെടുത്ത് ശക്തിപ്പെടുത്തണമെന്ന് 'കാംപസ് തിരോധാനങ്ങളുടെ രാഷ്ട്രീയം' പ്രതിഷേധ സംഗമം ആവശ്യപ്പെട്ടു.
ഡെമോക്രസി ഡയലോഗ് ഫോറം സംസ്ഥാന കമ്മിറ്റിയാണ് സംഗമം സംഘടിപ്പിച്ചത്.
കോഴിക്കോട് ഇന്‍ഡോര്‍ സ്റ്റേഡിയത്തില്‍ നടന്ന പ്രതിഷേധ സംഗമത്തില്‍ സോളിഡാരിറ്റി സംസ്ഥാന സെക്രട്ടറി സാദിഖ് ഉളിയില്‍, ആക്ടിവിസ്റ്റ് സുദീപ് കെ.എസ്, കെ.എം.വൈ.എഫ് സംസ്ഥാന സെക്രട്ടറി കടയ്ക്കല്‍ ജുനൈദ്, ജി.ഐ.ഒ സംസ്ഥാന പ്രസിഡന്റ് പി. റുക്‌സാന, എസ്.ഐ.ഒ സംസ്ഥാന സെക്രട്ടറി ഷംസീര്‍ ഇബ്രാഹീം, എന്‍.എസ്.എല്‍ സംസ്ഥാന സെക്രട്ടറി ഫാരിസ് കൊടുവള്ളി, ഐ.എസ്.എഫ് സംസ്ഥാന സെക്രട്ടറി ഉസ്മാന്‍ കാച്ചടി, വെല്‍ഫെയര്‍ പാര്‍ട്ടി ജില്ലാ പ്രസിഡന്റ് അസ്‌ലം ചെറുവാടി, ഡി.ഡി.എഫ് സംസ്ഥാന കമ്മറ്റിയംഗം കെ.എസ് നിസാര്‍ സംസാരിച്ചു. ഫറൂഖ് കോളജ് വിദ്യാര്‍ഥി ആയിഷ നൗറിന്‍ കവിത അവതരിപ്പിച്ചു.
ഡി.ഡി.എഫ് സംസ്ഥാന കമ്മിറ്റിയംഗം പ്രദീപ് നെന്മാറ അധ്യക്ഷനായി.
ഡി.ഡി.എഫ് കോഴിക്കോട് ജില്ലാ കോഡിനേറ്റര്‍ അബ്ദുറഹീം സ്വാഗതവും ജില്ലാ അസി. കോഡിനേറ്റര്‍ അസ്മ മന്‍ഹാം നന്ദിയും പറഞ്ഞു.