കോഴിക്കോട്: നഗരത്തില്‍ വീണ്ടും ഓണ്‍ലൈന്‍ ടാക്‌സിക്ക് നേരെ അതിക്രമം. വിവിധ ട്രേഡ് യൂനിയനുകളുടെ നേതൃത്വത്തിലാണ് ഇന്നലെ മാംഗോ കാബ് ഓണ്‍ലൈന്‍ ടാക്‌സി കാര്‍ തടഞ്ഞത്. യാത്രക്കാരായ രണ്ടു സ്ത്രീകളെ ഇറക്കി വിടുകയും ചെയ്തു. ഇന്നലെ ഉച്ചയ്ക്ക് 12.30ഓടെ റെയില്‍വേ സ്റ്റേഷന്‍ ലിങ്ക് റോഡില്‍ അപ്‌സര തിയേറ്ററിനു സമീപം നാട്ടുകാര്‍ നോക്കിനില്‍ക്കെയാണ് വാഹനം തടഞ്ഞുനിര്‍ത്തി യാത്രക്കാരെ ഇറക്കിവിട്ടത്.
മംഗളൂരു സ്വദേശിയായ മുതിര്‍ന്ന സ്ത്രീയും അവരുടെ ബന്ധുവുമാണ് ഇന്നലെ ഉച്ചയ്ക്ക് മാംഗോ കാബ്‌സ് ബുക്ക് ചെയ്ത് യാത്ര തുടങ്ങിയത്. യാത്ര ലിങ്ക് റോഡിലെത്തിയപ്പോള്‍ ടാക്‌സി ഡ്രൈവര്‍മാര്‍ ഇവരെ വളഞ്ഞു. തുടര്‍ന്ന് കാറിന് മുകളില്‍ യൂനിയന്റെ കൊടിയും കെട്ടി. യാതൊരു കാരണവശാലും മാംഗോ കാബ്‌സില്‍ യാത്ര തുടരാന്‍ അനുവദിക്കില്ലെന്നായിരുന്നു ടാക്‌സി ഡ്രൈവര്‍മാരുടെ നിലപാട്. കാര്‍ ഡ്രൈവറെ പിടിച്ചു പുറത്തിറക്കി ഭീഷണിപ്പെടുത്തുകയും ചെയ്തു. യാത്ര തുടരാതിരിക്കാന്‍ കാറിന്റെ നാലു ചക്രങ്ങളിലെയും കാറ്റ് തുറന്നുവിടുകയും ചെയ്തു.