ബാവലി: ബാവലിയിലും പരിസര പ്രദേശങ്ങളിലും കടുവയുടെ ആക്രമണം തുടര്‍ക്കഥയാവുന്നു. ഇന്നലെ ഷാണമംഗലം കരിയപ്പന്റെ കറവയുള്ള പശുവിനെ കടുവ ആക്രമിച്ച് ഗുരുതരമായി പരുക്കേല്‍പ്പിച്ചു. പശുവിന്റെ ശബ്ദം കേട്ട് ഓടിയെത്തിയ നാട്ടുകാര്‍ കടുവ ഓടി പോവുന്നത് കണ്ടതായി പറഞ്ഞു. നാലുദിവസം മുമ്പ് പ്രദേശത്തെ കട്ടക്കയം മേരിയുടെ പശുവിനെ കടുവ ആക്രമിച്ച് കൊന്നിരുന്നു. അന്ന് സംഭവ സ്ഥലം സന്ദര്‍ശിച്ച വനം വകുപ്പ് ഉദ്യോസ്ഥര്‍ കടുവയെ പിടികൂടുന്നതിന് കൂട് സ്ഥാപിക്കുമെന്ന് ഉറപ്പ് നല്‍കിയിരുന്നു.
എന്നാല്‍ നടപടികള്‍ ഒന്നും തന്നെ ഉണ്ടായില്ല. ഇതിനിടയിലാണ് വീണ്ടും കടുവയുടെ ആക്രമണം ഉണ്ടായിരിക്കുന്നത്. രണ്ട് മാസത്തിനിടെ ബാവലിയിലും പരിസര പ്രദേശങ്ങളിലും അഞ്ചു ആടുകളെയും രണ്ടു പശുക്കളെയുമാണ് കടുവ ആക്രമിച്ച് കൊന്നത്. കടുവയെ പിടികൂടുന്നതിന് അടിയന്തിര നടപടികള്‍ ഉണ്ടായില്ലെങ്കില്‍ ശക്തമായ പ്രക്ഷോഭ പരിപാടികള്‍ക്ക് തയാറെടുക്കുകയാണ് നാട്ടുകാര്‍.