റിയാദ്: പണം വെളുപ്പിക്കല്‍ കേസില്‍ ജിദ്ദ ക്രിമിനല്‍ കോടതിയില്‍ ഏഴു കേസുകള്‍ നടക്കുന്നതായി അധികൃതര്‍ വെളിപ്പെടുത്തി. 1600 കോടി റിയാല്‍ വെളുപ്പിച്ചതായാണ് ഈ കേസുകളിലെ പ്രതികള്‍ നേരിടുന്ന ആരോപണം. പണം വെളുപ്പിക്കല്‍ കേസില്‍ മുപ്പതു പ്രതികളെ അറസ്റ്റ് ചെയ്യുകയും 15 പ്രതികളെ താല്‍ക്കാലിക ജാമ്യത്തില്‍ വിട്ടയയ്ക്കുകയും ചെയ്തിട്ടുണ്ട്. ഇതില്‍ ഒരു കേസില്‍ 20 ഇന്ത്യക്കാരും ബാങ്ക് മാനേജര്‍മാരും വ്യവസായികളും കമ്പനി അധികൃതരുമടക്കമാണ് പ്രതികളായവര്‍.

വ്യവസായികളുടെ അക്കൗണ്ടില്‍ ഇന്ത്യക്കാര്‍ നിക്ഷേപിക്കുന ഭീമമായ പണം ബാങ്ക് മാനേജര്‍മാരുടെയും ജീവനക്കാരുടെയും ഒത്താശയോടെ ദുബായിലേക്ക് അയച്ച കേസിലാണ് 20 ഇന്ത്യക്കാര്‍ അടക്കമുള്ള പ്രതികള്‍ വിചാരണ നേരിടുന്നത്. 200 കോടി റിയാല്‍ വെളുപ്പിച്ച കേസില്‍ വിചാരണ അടുത്ത മാസം കോടതിയില്‍ വിചാരണ ആരംഭിക്കും. ഒന്‍പതു പേര്‍ പ്രതികളായ 800 കോടി റിയാല്‍ കേസിലും താമസിയാതെ വാദം ആരംഭിക്കും.

കഴിഞ്ഞയാഴ്ച മിഡില്‍ ഈസ്റ്റിലെ ഏറ്റവും വലിയ കള്ള പണം വെളുപ്പിക്കല്‍ കേസില്‍ 18 ഇന്ത്യക്കാരടക്കം 33 പ്രതികള്‍ക്ക് സഊദി ക്രിമിനല്‍ കോടതി ശിക്ഷ വിധിച്ചിരുന്നു. 3600 കോടി റിയാലിന്റെ കള്ള പണം വെളുപ്പിക്കല്‍ കേസിലാണ് റിയാദ് ക്രിമിനല്‍ കോടതി പ്രതികള്‍ക്ക് ശിക്ഷ വിധിച്ചത്.