തിരുവനന്തപുരം: നോട്ടുകള്‍ അസാധുവാക്കിയത് വഴി ലാഭം കൊയ്തത് സ്വകാര്യ ഓണ്‍ലൈന്‍ പണമിടപാട് കേന്ദ്രങ്ങളാണെന്ന് മുന്‍ മുഖ്യമന്ത്രി ഉമ്മന്‍ചാണ്ടി. paytm പോലുള്ള ഓണ്‍ലൈന്‍ പണമിടപാട് കേന്ദ്രങ്ങള്‍ അതിന് ഉദാഹരണമാണെന്നും അദ്ദേഹം ചൂണ്ടിക്കാട്ടി. ഒരു രാത്രി കൊണ്ട് രാജ്യത്തെ 84 ശതമാനത്തിലധികം നോട്ടുകളാണ് പ്രധാനമന്ത്രി അസാധുവാക്കിയത്. ജനജീവിതം ഈ ഒരൊറ്റ നീക്കം കൊണ്ട് ദുരിതപൂര്‍ണമായി. 
ഇത് ജനത്തോടുള്ള ക്രിമിനല്‍ നടപടിയാണെന്നും അദ്ദേഹം പറഞ്ഞു.

500, 1000 നോട്ടുകള്‍ അസാധുവാക്കിയ പ്രധാനമന്ത്രിയുടെ ധീരമായ തീരുമാനത്തെ അഭിനന്ദിക്കുന്നു. എന്നാല്‍, തീര്‍ത്തും പ്ലാനിങ്ങില്ലാതെ നടപ്പാക്കിയ ഒരു പദ്ധതിയാണിത്. നോട്ട് നിരോധനം വന്ന് 14ാം ദിവസമെത്തിയിട്ടും രാജ്യത്ത് പിന്‍വലിച്ച നോട്ടുകള്‍ക്ക് പകരം നോട്ടുകളെത്തിക്കാനായിട്ടില്ലെന്നും ഉമ്മന്‍ചാണ്ടി പറഞ്ഞു. സഹകരണമേഖലയിലെ പ്രതിസന്ധി പരിഹരിക്കാന്‍ ഭരണപക്ഷത്തിനൊപ്പം പ്രതിപക്ഷവും ഉണ്ടാവുമെന്നും അദ്ദേഹം പറഞ്ഞു.