കാസര്‍കോട്: തമിഴ്‌നാട്ടിലെ കൃഷ്ണഗിരി ജില്ലയിലെ ബാങ്ക് ഓഫ് ബറോഡയില്‍ നിന്ന് 42 കിലോ സ്വര്‍ണം കവര്‍ന്നതും മറ്റു ഉത്തരേന്ത്യന്‍ സംസ്ഥാനങ്ങളിലെ ജ്വല്ലറികളില്‍ കവര്‍ച്ച നടത്തിയതും ഇതേ സംഘമാണെന്ന് പൊലിസ് തിരിച്ചറിഞ്ഞു. യു.പിയില്‍ പ്രതികളുടെ വീടുകള്‍ അന്വേഷിച്ച് കാസര്‍കോട് പൊലിസ് എത്തുമ്പോഴാണ് കൊള്ളസംഘത്തെ നാട്ടുകാര്‍ പോലും തിരിച്ചറിയുന്നത്. കവര്‍ച്ചക്ക് പദ്ധതിയിട്ടെത്തുന്ന സംഘം പ്രദേശത്തെ ആരെയെങ്കിലും ഒപ്പം കൂട്ടാറുണ്ട്. ഇവരാണ് പലപ്പോഴും കേസില്‍ കുടുങ്ങുന്നത്.
പഴുതുകളൊന്നും നല്‍കാതെ അഞ്ചംഗ സംഘം രക്ഷപ്പെടുകയാണ് പതിവ്. ബാങ്ക് ഓഫ് ബറോഡയില്‍ നടത്തിയ കവര്‍ച്ചയിലും ഇതാണ് നടന്നത്. 35 കിലോ സ്വര്‍ണവുമായി തദ്ദേശീയരായ ചിലര്‍ പിടിയിലായെങ്കിലും ഏഴ് കിലോ സ്വര്‍ണവുമായി പ്രതികള്‍ തന്ത്രപൂര്‍വ്വം രക്ഷപ്പെടുകയായിരുന്നു.