കൊച്ചി: കേരള കുഡുംബി ഫെഡറേഷന്റെ സംസ്ഥാനസമ്മേളനം ഇന്നും നാളെയും എറണാകുളം തൃപ്പൂണിത്തുറയില്‍ നടക്കുമെന്ന് ഭാരവാഹികള്‍ വാര്‍ത്താ സമ്മേളനത്തില്‍ പറഞ്ഞു. രാവിലെ 10ന് പൂര്‍ണശ്രീ ആഡിറ്റോറിയത്തില്‍ നടക്കുന്ന പ്രതിനിധിസമ്മേളനം ഡോ.എന്‍ നിര്‍മ്മല ഉദ്ഘാടനം ചെയ്യും. കുഡുംബി അസോസിയേഷന്‍ സംസ്ഥാന പ്രസിഡന്റ് ഓലയില്‍ ജി ബാബു അധ്യക്ഷത വഹിക്കും. തൃപ്പൂണിത്തുറ ലായം കൂത്തമ്പലം ഹാളില്‍ നാളെ രാവിലെ 11ന് നടക്കുന്ന സൗഹൃദ സംഗമം കൊങ്കണി സാഹിത്യ അക്കാദമി ഉപദേശകസമിതി അംഗം എല്‍ സുബ്രഹ്മണ്യന്‍ ഉദ്ഘാടനം ചെയ്യും.
ഉച്ചയ്ക്ക് 2.30ന് നടക്കുന്ന പൊതുസമ്മേളനം പന്തളം വലിയ കോയിക്കല്‍ മകം തിരുനാള്‍ കേരളവര്‍മ്മ രാജ ഉദ്ഘാടനം ചെയ്യും. പ്രൊഫ.കെ.വി തോമസ് എം.പി, ബി.ജെ.പി സംസ്ഥാന ജനറല്‍ സെക്രട്ടറി എ. എന്‍ രാധാകൃഷ്ണന്‍, സി.പി.എം എറണാകുളം ജില്ലാ സെക്രട്ടറി പി രാജീവ് എന്നിവര്‍ മുഖ്യപ്രഭാഷണം നടത്തും. തൊഴില്‍ സംവരണം,വിദ്യാഭ്യാസ സംവരണം തുടങ്ങി സമുദായത്തിന് സര്‍ക്കാരില്‍ നിന്നും അനുവദിച്ചു കിട്ടേണ്ട ആവശ്യങ്ങള്‍ സംസ്ഥാനസമ്മേളനം ചര്‍ച്ച ചെയ്യുമെന്നും ഭാരവാഹികള്‍ പറഞ്ഞു. വാര്‍ത്താ സമ്മേളനത്തില്‍ കേരള കുടുംബി ഫെഡറേഷന്‍ ജനറല്‍ കണ്‍വീനര്‍ എസ് സുധീര്‍,ട്രഷറര്‍ ചിന്നന്‍ സി കവലയ്ക്കല്‍, സി.ആര്‍ മനോജ്കുമാര്‍ പങ്കെടുത്തു.