കോവളം: കടലില്‍ കുളിക്കുന്നതിനിടെ ഒഴുക്കില്‍പ്പെട്ട ഡല്‍ഹി സ്വദേശിയായ പതിനാറുകാരനെ ലൈഫ് ഗാര്‍ഡുകള്‍ രക്ഷപ്പെടുത്തി.ഇന്നലെ വൈകിട്ടു ആറുമണിയോടെയായിരുന്നു സംഭവം. മാതാപിതാക്കള്‍ക്കൊപ്പം കടലില്‍ കുളിക്കവെ ശക്തമായ തിരയടിച്ച് ഒഴുക്കില്‍പ്പെടുകയായിരുന്നു.ലൈഫ് ഗാര്‍ഡ് സൂപ്പര്‍വൈസര്‍ സിസില്‍പെരേരയുടെ നേതൃത്വത്തില്‍ ഗാര്‍ഡുകളായ ഇബ്രാഹിം ,റോജിന്‍ ഗോമസ്, ആര്‍. അനില്‍കുമാര്‍ എന്നിവരാണ് രക്ഷാപ്രവര്‍ത്തനം നടത്തിയത്.

ബാലവേലയ്ക്ക് കേസെടുത്തു

പേരൂര്‍ക്കട: പതിമൂന്നുകാരനെക്കൊണ്ട് വീട്ടുജോലി ചെയ്യിച്ചതിന് വീട്ടുടമക്കെതിരേ മണ്ണന്തല പൊലിസ് കേസെടുത്തു. ഉത്തര്‍പ്രദേശ് സ്വദേശിയായ 13 കാരനെയാണ് വീട്ടുകാര്‍ ജോലിക്കു നിര്‍ത്തിയത്. കഴിഞ്ഞ ജൂലൈ മുതല്‍ കുട്ടി മണ്ണന്തലയിലെ ഒരു വീട്ടില്‍ ജോലിക്കു നില്‍ക്കുകയാണ്. രഹസ്യവിവരം ലഭിച്ചതിന്റെ അടിസ്ഥാനത്തില്‍ ചൈല്‍ഡ്‌ലൈന്‍ പ്രവര്‍ത്തകര്‍ കഴിഞ്ഞദിവസം വീട് പരിശോധിക്കുകയും സംഭവം സത്യമാണെന്നു കണ്ടെത്തുകയുമായിരുന്നു. പ്രവര്‍ത്തകര്‍ കുട്ടിയെ മോചിപ്പിച്ചശേഷം സ്വന്തം സ്ഥലത്തേക്ക് മടക്കി അയച്ചു. മണ്ണന്തല പൊലിസാണ് കേസെടുത്തത്.