കോഴിക്കോട് : അഴിമതി തടയുക എന്ന ലക്ഷ്യത്തോടെ തദ്ദേശ സ്വയംഭരണ സ്ഥാപനങ്ങളുടെ നേതൃത്വത്തില്‍ ഫോര്‍ ദ പീപ്പിള്‍ വെബ്‌സൈറ്റ് ഉടന്‍ ആരംഭിക്കുമെന്ന് തദ്ദേശ വികസന വകുപ്പ് മന്ത്രി കെ.ടി ജലീല്‍. കോഴിക്കോട് ടാഗോര്‍ ഹാളില്‍ നടന്ന നവകേരള മിഷന്റെ ഹരിത കേരളം പദ്ധതി ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. അഴിമതിയോടു വിട്ടുവീഴ്ച്ച ചെയ്യുക എന്നാല്‍ ഒരു നാടിന്റെ നാശമാണെന്നും അദ്ദേഹം കൂട്ടിച്ചേര്‍ത്തു. സര്‍ക്കാര്‍ സ്ഥാപനങ്ങളില്‍ അഴിമതി ശ്രദ്ധയില്‍പ്പെട്ടാല്‍ ജനങ്ങള്‍ക്ക് അത് ഓഡിയോ-വിഡിയോ രൂപങ്ങളില്‍ റെക്കോര്‍ഡ് ചെയ്ത് ആ തെളിവുകള്‍ വെബ്‌സൈറ്റില്‍ അപ്‌ലോഡ് ചെയ്യാം. ഇതില്‍ അന്വേഷണം നടത്തി ഉടന്‍ നടപടി സ്വീകരിക്കും.
പഞ്ചായത്ത് ഓഫിസുകളിലെ പ്രവര്‍ത്തനങ്ങള്‍ കൃത്യമായി നടക്കുന്നുണ്ടോ എന്നറിയാന്‍ മുന്നറിയിപ്പില്ലാതെ പരിശോധനകള്‍ നടത്തും. ഇതിനായി എം.എല്‍.എമാരെ ചുമതലപ്പെടുത്തുമെന്നും അദ്ദേഹം പറഞ്ഞു. ചടങ്ങില്‍ മേയര്‍ തോട്ടത്തില്‍ രവീന്ദ്രന്‍ അദ്ധ്യക്ഷനായി.
അസിസ്റ്റന്റ് കലക്ടര്‍ ഇമ്പശേഖരന്‍, ഹരിത കേരളം ചെയര്‍ പേഴ്‌സണ്‍ ഡോ. ടി.എന്‍ സീമ, റവന്യൂ പ്രിന്‍സിപ്പല്‍ സെക്രട്ടറി ടി.കെ ജോസ് , ശുചിത്വ മിഷന്‍ എക്‌സിക്യുട്ടീവ് ഡയറക്ടര്‍ ഡോ.കെ. വാസുകി , സി.കെ വിജയകുമാര്‍ എന്നിവര്‍ സംസാരിച്ചു.