മരങ്ങാട്ടുപിള്ളി: എം.ഡി. സെമിനാരി ഹയര്‍സെക്കന്‍ഡറിയുടെ അഭിമാനമായി മാറിയ ജയജിത്തിന്റെ പേരു പോലെ തന്നെയായിരുന്നു മത്സരവും.
സീനിയര്‍ വിഭാഗം ആണ്‍കുട്ടികളുടെ 800 മീറ്റര്‍ ഓട്ടമത്സരത്തില്‍ ഒന്നാമതെത്തി ജയജിത്ത് പ്രസാദ് ജയം പേരില്‍മാത്രമല്ലെന്ന് വീണ്ടും തെളിയിച്ചു.
കഴിഞ്ഞ രണ്ടു വര്‍ഷമായി ജയജിത്ത് ജൂനിയര്‍ വിഭാഗം 800മീറ്റര്‍ ഓട്ടമത്സരത്തില്‍ ഒന്നാം സ്ഥാനത്തിനുടമയാണ്. എം.ഡി സെമിനാരി ഹയര്‍ സെക്കന്‍ഡറി സ്‌കൂളിലെ പ്ലസ വണ്‍ വിദ്യാര്‍ഥിയാണ് ട്രാക്കിലെ ഈ താരം. ജൂനിയര്‍ വിഭാഗത്തില്‍ നിന്നും സീനിയര്‍ വിഭാഗത്തിലേക്കു മാറിയപ്പോഴും 800മീറ്റര്‍ ഓട്ടത്തിലെ സമ്മാനം നേടുന്ന പതിവു ജയജിത്ത് തെറ്റിച്ചില്ല.
തിരുവനന്തപുരം കിഴക്കേവീട്ടില്‍ ജയപ്രസാദ് സംഗീത ദമ്പതികളുടെ മകനാണ്.
ജയപ്രസാദ് മാതൃഭൂമി ജീവനക്കാരനും സംഗീത റിട്ടയേര്‍ഡ് അധ്യാപികയുമാണ്. ഇന്നു നടക്കുന്ന 1500മീറ്റര്‍ ഓട്ടത്തിലും ജയജിത്ത് പങ്കെടുക്കുന്നുണ്ട്. ബിബിന്‍ ഫ്രാന്‍സിസാണ് പരിശീലകന്‍.