തിരുവനന്തപുരം: പയ്യന്നൂരില്‍ മകള്‍ അമ്മയെ ക്രൂരമായി പീഡിപ്പിച്ച സംഭവം സമൂഹ്യനീതി വകുപ്പ് ഗൗരവമായി കാണുന്നുവെന്നും സംഭവത്തെക്കുറിച്ച് ഉചിതമായ നടപടിസ്വീകരിക്കുമെന്നും മന്ത്രി കെ.കെ.ശൈലജ. വയോധികരെ സംരക്ഷിക്കാനുള്ള ഉത്തരവാദിത്വം മക്കള്‍ക്കും കുടുംബാംഗങ്ങള്‍ക്കുമുണ്ട് ധാര്‍മികമായി ഈ ഉത്തരവാദിത്വം സ്വമേധയാ ഏറ്റെടുക്കുകയാണു വേണ്ടത്. എന്നാല്‍ ഇന്നത്തെ സമൂഹത്തില്‍ നിയമം മൂലം ഉത്തരവാദിത്വം ഉറപ്പാക്കേണ്ട സ്ഥിതി ഉണ്ടായിരിക്കയാണ്.
വ്യദ്ധമന്ദിരത്തിലും മറ്റും വയോധികരായ സ്ത്രീകള്‍ ലൈംഗികാതിക്രമത്തിനടക്കം വിധേയരാവുന്നുവെന്ന പരാതിയും ലഭിച്ചിട്ടുണ്ട്. ഇതുസംബന്ധിച്ചു മുഖ്യമന്ത്രിയുടെ നിര്‍ദേശപ്രകാരം ഒരു ഉന്നതതലസമിതി രൂപീകരിച്ചിട്ടുണ്ട്. ജസ്റ്റിസ് രാമചന്ദ്രന്‍നായര്‍ അധ്യക്ഷനായി സമിതി അന്വേഷണം ആരംഭിച്ചുകഴിഞ്ഞു. റിപ്പോര്‍ട്ട് ലഭ്യമാവുന്ന മുറയ്ക്കു നടപടി സ്വീകരിക്കുമെന്നും മന്ത്രി അറിയിച്ചു.