സമാജ്‌വാദിപാര്‍ട്ടി-എസ്.ഡി.പി.ഐ സഖ്യം എന്ന പേരിലായിരുന്നു പ്രചാരണം

കാവനൂര്‍: നിയമസഭാ തെരഞ്ഞെടുപ്പിന്റെ ഫലം പുറത്തുവന്നതോടെ ജില്ലയില്‍ എസ്.ഡി.പി.ഐ യുടെ ബലഹീനത കൂടുതല്‍ പ്രകടമായി. 16 സീറ്റിലും സമാജ്‌വാദി പാര്‍ട്ടിയുമായി സഖ്യമുണ്ടാക്കി മല്‍സരിച്ച എസ്.ഡി.പി.ഐക്ക് ഒറ്റക്ക് മല്‍സരിച്ച് 2011 നേടിയ വോട്ട് പോലും നേടാനായില്ല. 2011 ല്‍ ജില്ലയില്‍ 16 മണ്ഡലങ്ങളില്‍ നിന്നായി 44,415 വോട്ട് നേടിയിരുന്നു. എന്നാല്‍ ഇത്തവണ 34881 വോട്ട് മാത്രമേ നേടാനായുള്ളൂ. 2011 നെക്കാള്‍ പതിനായിരത്തോളം വോട്ടുകളുടെ കുറവാണ് ഈ തെരഞ്ഞെടുപ്പിലുണ്ടായത്.
ജില്ലയില്‍ 16 മണ്ഡലങ്ങളില്‍ 15 ലും എസ്.ഡി.പി.ഐ മല്‍സരിച്ചപ്പോള്‍ സഖ്യകക്ഷിയായ എസ്.പിക്ക് നല്‍കിയത് കഴിഞ്ഞ നിയമസഭാ തെരഞ്ഞെടുപ്പില്‍ ഏറ്റവും കുറഞ്ഞ വോട്ട് നേടിയ മണ്ഡലങ്ങളിലൊന്നായ ഏറനാട് മണ്ഡലമാണ്.
ജില്ലയിലെ പതിനാല് മണ്ഡലങ്ങളില്‍ കഴിഞ്ഞ നിയമസഭാ തെരഞ്ഞെടുപ്പിനെക്കാള്‍ വോട്ട് കുറഞ്ഞപ്പോള്‍ പേരിനെങ്കിലും വോട്ട് വര്‍ധന ഉണ്ടായത് കൊണ്ടോട്ടിയിലും നിലമ്പൂരിലും മാത്രമാണ്. കൊണ്ടോട്ടിയില്‍ 1641 വോട്ടും നിലമ്പൂരില്‍ 2185 വോട്ടുമാണ് അധികം ലഭിച്ചത്. എന്നാല്‍ കൊണ്ടോട്ടിയില്‍ മല്‍സരിച്ച ജില്ലാ പ്രസിഡന്റ് നാസറുദ്ദീന്‍ എളമരത്തിന് ആകെ ലഭിച്ചത് 3667 വോട്ട് മാത്രമാണ്. വിവിധ മണ്ഡലങ്ങളില്‍ കഴിഞ്ഞ തവണ ലഭിച്ച വോട്ട് താഴെ പറയുന്നു. ബ്രായ്ക്കറ്റില്‍ 2016 ല്‍ ലഭിച്ച കണക്ക്.
ഏറനാട് 2137 (1298), മങ്കട 3015 (1456), വേങ്ങര 4683(3049), താനൂര്‍ 3137 (1151 ), തിരൂര്‍ 2696 (1828), കോട്ടക്കല്‍ 2650 (1719), തവനൂര്‍ 3116 (2649), പൊന്നാനി 3250 (1659), വണ്ടൂര്‍ 1682 (1178), മഞ്ചേരി 2906 (2357), മലപ്പുറം 3968 (2444), വള്ളിക്കുന്ന് 2571 (2499), തിരൂരങ്ങാടി 2945 (2478) പെരിന്തല്‍മണ്ണ 1067 (698).
വണ്ടൂര്‍, മഞ്ചേരി, പെരിന്തല്‍മണ്ണ, മങ്കട, മലപ്പുറം, താനൂര്‍, തിരൂര്‍, പൊന്നാനി മണ്ഡലങ്ങളില്‍ വെല്‍ഫയര്‍ പാര്‍ട്ടിക്കും കോട്ടക്കല്‍, വള്ളിക്കുന്ന് മണ്ഡലങ്ങളില്‍ പി.ഡി.പി ക്കും താഴെയാണ് എസ്.ഡി.പി.ഐയുടെ സ്ഥാനം. കഴിഞ്ഞ ലോകസഭാ തെരഞ്ഞെടുപ്പില്‍ മലപ്പുറം മണ്ഡലത്തില്‍ മാത്രം അരലക്ഷത്തിനടുത്ത് വോട്ട് പിടിച്ച എസ്.ഡി.പി.ഐ ഈ തെരഞ്ഞെടുപ്പില്‍ ജില്ലയിലെ മുഴുവന്‍ മണ്ഡലങ്ങളില്‍ നിന്നുമായി നേടിയത് വെറും 34881 വോട്ട് മാത്രമാണ്.