മലപ്പുറം: കാലിക്കറ്റ് സര്‍വകലാശാലാ സ്റ്റേഡിയത്തില്‍ നടക്കുന്ന മലപ്പുറം റവന്യൂ ജില്ലാ സ്‌കൂള്‍ കായികോത്സവത്തിന്റെ രണ്ടാംദിന മത്സരങ്ങള്‍ പൂര്‍ത്തിയായപ്പോള്‍ എടപ്പാല്‍ ഉപജില്ല മുന്നേറ്റം തുടരുന്നു. 186 പോയിന്റുകളുമായി എടപ്പാള്‍ ഒന്നാംസ്ഥാനത്തു നില്‍ക്കുമ്പോള്‍ വേങ്ങര ഉപജില്ല 84 പോയിന്റുകളോടെ രണ്ടാംസ്ഥാനത്തും 56 പോയിന്റുകളുമായി മങ്കട മൂന്നാംസ്ഥാനത്തുമാണ്. 25 സ്വര്‍ണവും 17 വെള്ളിയും ഏഴു വെങ്കലവുമായാണ് എടപ്പാളിന്റെ മുന്നേറ്റം.
സ്‌കൂളുകളില്‍ എടപ്പാള്‍ സബ്ജില്ലയിലെ കടകശ്ശേരി ഐഡിയലാണ് മുന്നിട്ടുനില്‍ക്കുന്നത്. 23 സ്വര്‍ണവും 11 വെള്ളിയും അഞ്ചു വെങ്കലവുമുള്‍പ്പെടെ 153 പോയിന്റുകളാണ് രണ്ടു ദിവസങ്ങളിലായി ഐഡിയല്‍ സ്വന്തമാക്കിയത്. 43 പോയിന്റുകളോടെ മങ്കട സബ്ജില്ലയിലെ പെരിയാപുരം സെന്റ് മേരീസ് ഹയര്‍സെക്കന്‍ഡറി സ്‌കൂളാണ് രണ്ടാം സ്ഥാനത്ത്. കിഴിശ്ശേരി സബ്ജില്ലയിലെ പൂക്കളത്തൂര്‍ സി.എച്ച്.എം.എച്ച്.എസ് 24 പോയിന്റുകളോടെ മൂന്നാം സ്ഥാനത്തുണ്ട്.