കോഴിക്കോട്: തെരഞ്ഞെടുപ്പ് ഫലം കൃത്യമായി പ്രവചിച്ച് മജീഷ്യന്‍ ചക്രപാണി കുറ്റ്യാടി കൈയടി നേടി. വിധിദിനത്തിനു രണ്ടുദിവസം മുന്‍പ് യു.ഡി.എഫിനും എല്‍.ഡി.എഫിനും എന്‍.ഡി.എക്കും മറ്റുള്ളവര്‍ക്കുമായി എത്ര വീതം സീറ്റുകള്‍ ലഭിക്കുമെന്നു രേഖപ്പെടുത്തിയ ഫലപ്രവചന പെട്ടി ഇന്നലെ തുറന്നപ്പോഴാണ്, കേരളം നെഞ്ചിടിപ്പോടെ വീക്ഷിച്ച തെരഞ്ഞെടുപ്പു ഫലം അതേപോലെ ആവര്‍ത്തിച്ചത്.
സ്‌പോര്‍ട്‌സ് കൗണ്‍സില്‍ ഹാളില്‍ നടന്ന ചടങ്ങില്‍ പ്രസ്‌ക്ലബ് പ്രസിഡന്റ് കമാല്‍ വരദൂര്‍, സിറ്റി സ്‌പെഷല്‍ ബ്രാഞ്ച് പൊലിസ് അസിസ്റ്റന്റ് കമ്മിഷണര്‍ എം.പി പ്രേമദാസ് എന്നിവരുടെ നേതൃത്വത്തിലാണ് പെട്ടിതുറന്നു പരിശോധിച്ചത്. എല്‍.ഡി.എഫ് 91, യു.ഡി.എഫ് 47, എന്‍.ഡി.എ 1, മറ്റുള്ളവര്‍ 1 എന്നിങ്ങനെ പേപ്പറില്‍ രേഖപ്പെടുത്തിയ കേരള നിയമസഭയിലെ മാജിക്‌സംഖ്യ പ്രഖ്യാപിച്ചതോടെ ആരവങ്ങളോടെയാണു സദസ് എതിരേറ്റത്. എരവട്ടൂര്‍ ബാലകൃഷ്ണന്‍, ഷാജി പയ്യോളി, ആത്മജ് കൃഷ്ണ, ശിവസാദ് പേരാമ്പ്ര, സുരേഷ് കല്ലോട് സംസാരിച്ചു.