അരീക്കോട്: കാടു മൂടിക്കിടക്കുന്ന അരീക്കോട് പഞ്ചായത്തിലെ അറവുശാലയും പരിസരവും സാമൂഹ്യവിരുദ്ധര്‍ താവളമാക്കുന്നു. പത്തുവര്‍ഷമായി ഉപയോഗിക്കാതെ കിടക്കുന്ന ഐ.ടി.ഐ പരിസരത്തെ അറവുശാലയാണ് രാത്രി കാലങ്ങളില്‍ സാമൂഹ്യവിരുദ്ധരുടെ സുഖവാസകേന്ദ്രമാവുന്നത്.
1992-93 കാലത്തെ ഭരണസമിതിയാണ് ഭൂമി വാങ്ങി അറവുശാലയുടെ നിര്‍മാണം പൂര്‍ത്തീകരിച്ചത്. അരീക്കോട് ടൗണിലും പരിസര പ്രദേശങ്ങളിലും നടക്കുന്ന കന്നുകാലി അറവുകള്‍ പ്രയാസം സൃഷ്ടിച്ചതോടെയാണ് പഞ്ചായത്തിന് കീഴില്‍ അറവുശാല തുടങ്ങിയത്. കുറച്ചുകാലം ഇത് പ്രവര്‍ത്തിച്ചിരുന്നെങ്കിലും പ്രദേശവാസികള്‍ക്ക് പ്രയാസമായതോടെ ഇതിന്റെ പ്രവര്‍ത്തനം നിര്‍ത്തിവെക്കുകയായിരുന്നു.
ആധുനിക രീതിയിലുള്ള സൗകര്യങ്ങള്‍ ഒരുക്കാതെ നിര്‍മാണം പൂര്‍ത്തീകരിച്ചതാണ് അറവുശാല പൂട്ടാന്‍ കാരണമായത്. അറവുമാലിന്യങ്ങള്‍ സംസ്‌കരിക്കാനുള്ള സൗകര്യങ്ങള്‍ ഇവിടെ ഒരുക്കിയിരുന്നില്ല.
ഉടമസ്ഥരില്ലാതെ അലഞ്ഞ് നടക്കുന്ന കന്നുകാലികളെ കെട്ടാനും ഈ കെട്ടിടം ഉപയോഗിച്ചിരുന്നു.
ലക്ഷങ്ങള്‍ മുടക്കി ചെലവഴിച്ച കെട്ടിടം പത്തുവര്‍ഷമായി കാട് മൂടി കിടക്കുന്നതാണ് മദ്യപാന്മാര്‍ക്കും മറ്റും സൗകര്യമായിരിക്കുന്നത്. അറവുശാലക്ക് പ്രവേശന കവാടമുണ്ടെങ്കിലും ആര്‍ക്കും യഥേഷടം കയറി ചെല്ലാവുന്ന അവസ്ഥയിലാണുള്ളത്. അതിനിടെ കെട്ടിടം ഉപകാരപ്രദമായ പദ്ധതികള്‍ക്കായി വിനിയോഗക്കാമെന്ന അഭിപ്രായവും ഉയര്‍ന്നിട്ടുണ്ട്.