തിരൂര്‍: കാവഞ്ചേരി തെക്കേ ജുമുഅത്ത് പള്ളി കമ്മിറ്റി ജനറല്‍ ബോഡിയോഗം തടസപ്പെടുത്താന്‍ ശ്രമം. കഴിഞ്ഞ വെള്ളിയാഴ്ച ജുമുഅയ്ക്കു ശേഷമായിരുന്നു സംഭവം. പള്ളിയുടെ മുകള്‍നിലയില്‍ ജനറല്‍ബോഡി യോഗം നടന്നുകൊണ്ടിരിക്കെ ഒരു സംഘമാളുകള്‍ ആയുധങ്ങളുമായിവന്നു യോഗം അലങ്കോലമാക്കാന്‍ ശ്രമിക്കുകയും ഭീഷണിപ്പെടുത്തുകയുമായിരുന്നെന്നു കമ്മിറ്റി ഭാരവാഹികള്‍ പറഞ്ഞു.
സംഭവത്തെ തുടര്‍ന്നു പൊലിസ് സ്ഥലത്തെത്തുകയും പുതിയ ഭാരവാഹികളോടും എതിര്‍കക്ഷികളോടും പൊലിസ് സ്റ്റേഷനിലെത്താന്‍ ആവശ്യപ്പെടുകയും ചെയ്തു. എന്നാല്‍, പള്ളി കമ്മിറ്റി ഭാരവാഹികള്‍ യഥാസമയം പൊലിസ് സ്റ്റേഷനില്‍ എത്തിയെങ്കിലും എതിര്‍കക്ഷികള്‍ സമവായ ചര്‍ച്ചയ്‌ക്കെത്തിയില്ല. ഇതോടെ തെരഞ്ഞെടുക്കപ്പെട്ട കമ്മിറ്റിയോട് തുടരാന്‍ പൊലിസ് നിര്‍ദേശിക്കുകയായിരുന്നു.
എതിര്‍കക്ഷികള്‍ വിഷയത്തെ രാഷ്ട്രീയവല്‍ക്കരിക്കാനും കുപ്രചാരണം നടത്താനുമാണ് ശ്രമിക്കുന്നതെന്നും അവര്‍ക്കെതിരേ നിയമനടപടി സ്വീകരിക്കുമെന്നും കമ്മിറ്റി പ്രസിഡന്റ് എം. അലവി, ജനറല്‍ സെക്രട്ടറി എ.പി സഖാഫ് തങ്ങള്‍ എന്നിവര്‍ അറിയിച്ചു.