കണ്ണൂര്‍: കേരളത്തിലെ തൊഴിലാളികള്‍ സ്ഥിരമായി ആശ്രയിക്കുന്ന ഇ.എസ്.ഐ ആശുപത്രി മേഖലയിലെ പ്രശ്‌നങ്ങള്‍ പരിഹരിക്കുന്നതിനായി 28നു തലസ്ഥാനത്ത് ചര്‍ച്ച നടത്തുമെന്ന് തൊഴില്‍-എക്‌സൈസ് മന്ത്രി ടി.പി രാമകൃഷ്ണന്‍ പറഞ്ഞു. മാസ്‌കോട്ട് റിസോര്‍ട്ടില്‍ കേരളാ ഗവണ്‍മെന്റ് ഇന്‍ഷുറന്‍സ് മെഡിക്കല്‍ ഓഫിസേഴ്‌സ് അസോസിയേഷന്‍ സംസ്ഥാന സമ്മേളനം ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി.
സംസ്ഥാനത്തെ ഒന്‍പതു ഇ.എസ്.ഐ ആശുപത്രികളും പരാധീനതകളാല്‍ വീര്‍പ്പുമുട്ടുകയാണ്. ഇ.എസ്.ഐയില്‍ ഇന്നു ലഭിക്കുന്ന സേവനം തൃപ്തികരമല്ല. ആവശ്യത്തിനു ഡോക്ടര്‍മാരില്ല. സേവനം ചെയ്യുന്ന ഡോക്ടര്‍മാരാണെങ്കില്‍ നിരവധി പ്രശ്‌നങ്ങള്‍ നേരിടുന്നുണ്ട്. ഇത്തരം കാര്യങ്ങളെല്ലാം ചര്‍ച്ച ചെയ്യുന്നതിനാണ് 28നു യോഗം വിളിക്കുന്നതെന്ന് മന്ത്രി വ്യക്തമാക്കി. ആശുപത്രികളുടെ പൊതു അവസ്ഥ വിലയിരുത്തുന്നതിനു മുഴുവന്‍ ആശുപത്രികളും സന്ദര്‍ശിക്കുമെന്നും മന്ത്രി പറഞ്ഞു.
ഇ.എസ്.ഐ കോര്‍പറേഷന്റെ നിലപാടാണ് മേഖലയില്‍ ഇന്നു നിലനില്‍ക്കുന്ന പ്രശ്‌നങ്ങള്‍ക്ക് പ്രധാനകാരണമെന്ന് മന്ത്രി പറഞ്ഞു. ഡോക്ടര്‍മാരുടെ മനോഭാവത്തിലടക്കം മാറ്റം വരുത്തേണ്ടതുണ്ടെന്നും മന്ത്രി ടി.പി രാമകൃഷ്ണന്‍ കൂട്ടിച്ചേര്‍ത്തു.