കൊച്ചി: സ്വന്തം മണ്ണില്‍ തോല്‍പ്പിക്കാനാവില്ലെന്ന സത്യം വടക്കുകിഴക്കന്‍മാരെ ബോധ്യപ്പെടുത്തി കേരള ബ്ലാസ്റ്റേഴ്‌സ്. അര ലക്ഷത്തിനു മുകളില്‍ കാല്‍പന്തു പ്രേമികള്‍ ആരവങ്ങളുമായി നിറഞ്ഞ മഞ്ഞക്കടലിനെ സാക്ഷിയാക്കിയാണ് ബ്ലാസ്റ്റേഴ്‌സിന്റെ സെമിയിലേക്കുള്ള മുന്നേറ്റം.
നോര്‍ത്ത്ഈസ്റ്റ് യുനൈറ്റഡിനെ ഏകപക്ഷീയമായ ഒരു ഗോളിനു തകര്‍ത്താണ് 22 പോയിന്റുമായി കേരളത്തിന്റെ കൊമ്പന്മാര്‍ രണ്ടണ്ടാം സ്ഥാനക്കാരായി അവസാന നാലിലേക്ക് കടന്നത്. രണ്ടണ്ടാം പകുതിയില്‍ മലയാളി താരം സി.കെ വിനീതാണ് വല ചലിപ്പിച്ച് താരമായത്.
ഈ മാസം പത്തിനു നടക്കുന്ന ആദ്യപാദ സെമിയില്‍ മുംബൈ സിറ്റി എഫ്. സി- അത്‌ലറ്റിക്കോ ഡി കൊല്‍ക്കത്തയേയും 11നു കേരള ബ്ലാസ്റ്റേഴ്‌സ് കൊച്ചിയില്‍ നടക്കുന്ന രണ്ടണ്ടാം സെമിയില്‍ ഡല്‍ഹി ഡൈനാമോസിനെയും നേരിടും. രണ്ടാംപാദ സെമി പോരാട്ടങ്ങള്‍ 13, 14 തിയതികളില്‍ നടക്കും.
4-1-4-1 ഫോര്‍മേഷനില്‍ പ്രതിരോധത്തിനു ഊന്നല്‍ നല്‍കിയാണ് കോപ്പല്‍ ടീമിനെ അണിനിരത്തിയത്. ഹോസുവിനു പകരം റിനോ ആന്റോയും മെഹ്താബിനു പകരം ഡക്കന്‍സ് നാസനും എന്‍ഡോയെക്കു പകരം അസ്രാക് മെഹ്മതും ഇറങ്ങി. മൂന്നു മലയാളി താരങ്ങള്‍ ബ്ലാസ്റ്റേഴ്‌സിന്റെ ആദ്യ ഇലവനില്‍ വന്നു.
ആദ്യ പകുതി ഗോള്‍രഹിതമായപ്പോള്‍ രണ്ടാം പകുതിയുടെ 60ാം മിനുട്ടില്‍ ബ്ലാസ്റ്റേഴ്‌സ് ഡെഡ് ലോക്ക് പൊട്ടിച്ചു. ഇടതു വശത്തു നിന്നു മുഹമ്മദ് റാഫി ഉയര്‍ത്തിവിട്ട പന്ത് പിടിച്ചെടുത്ത വിനീത് അതിമനോഹരമായി ഇരു കാലുകളിലായി തട്ടി മുന്നില്‍ നിന്ന റീഗന്‍ സിങിനെയും ഗോള്‍ കീപ്പര്‍ രഹ്‌നേഷിനേയും നിസഹായനാക്കി പോസ്റ്റിന്റെ ഇടതു മൂലയിലേക്കു പ്ലേസ് ചെയ്തു.
സമനില നേടാന്‍ നോര്‍ത്ത്ഈസ്റ്റ് കിണഞ്ഞു ശ്രമിച്ചെങ്കിലും പ്രതിരോധത്തിന്റെ കരുത്ത് ബ്ലാസ്റ്റേഴ്‌സിനെ തുണച്ചു. അവസാന മിനുട്ടുകളില്‍ കളി പരുക്കനായെങ്കിലും കൊമ്പന്‍മാരുടെ വിജയത്തിനു അതൊന്നും തടസ്സമായില്ല.