നിലമ്പൂര്‍: നീണ്ട ഇടവേളക്ക് ശേഷം എ.ടി.എമ്മുകളില്‍ നൂറിന്റെ നോട്ടുകളെത്തി, അരമണിക്കൂറിനകം വിരുതന്‍മാര്‍ പൊക്കി. മേലേചന്തക്കുന്ന് പെട്രോള്‍ പമ്പ് എസ്.ബി.ഐ എ.ടി.എം, താഴെ ചന്തക്കുന്ന് ഇന്‍ഡ്യന്‍ ബാങ്ക് എ.ടി.എം എന്നിവിടങ്ങളിലാണ് 2000ത്തിനു പുറമെ നൂറിന്റെ നോട്ടുകളെത്തിയത്. 2500 രൂപവരെ പിന്‍വലിക്കാന്‍ അവസരമുണ്ടായിരുന്നു. വിവരമറിഞ്ഞെത്തിയവര്‍ 1900 രൂപയും 600 രൂപയും രണ്ടുതവണകളായി പിന്‍വലിച്ചതോടെ നൂറുരൂപാനോട്ടുകള്‍ മിനിറ്റുകള്‍ക്കുള്ളില്‍ തീര്‍ന്നു.
അവധിദിവസമായിട്ടും ഇന്നലെ ബാങ്കുകളില്‍ വന്‍ തിരക്കാണ് അനുഭവപ്പെട്ടത്. സ്ത്രീകളും കുട്ടികളും വൃദ്ധരുമടക്കം പൊരിവെയിലത്തും വരി റോഡിലേക്ക് എത്തിയിരുന്നു. എണ്ണൂറോളം പേര്‍ക്കാണ് ഇന്നലെ എസ്.ബി.ടി ടോക്കണ്‍ നല്‍കിയത്. അതേസമയം ഭൂരിഭാഗം എ.ടി.എമ്മുകളും ഇന്നലെയും അടഞ്ഞുകിടന്നു.